Vienan Karjala

Kirjutukset vienankarjalakse

"Sattuma" ozuau

Kymmenes vuvves “Sattumas” on luajittu äijän. On piästetty ilmah nelli diskua. Viijes ezitettih kaččojile vuozipäivän konsertas, kudai piettih Kanzallizes teatras. Uvven diskan nimi on “JOO KYLLÄ!”. // Kuva: Viktor Gornostajev

Meigäläine “Sattuma” on vuozipäivyniekku. Joukko täyttäy kymmene vuottu

En sanos, ku en kuundele midä pajatetah ven’alazet da ulgomualazet kuulužat pajattajat. Kuundelen, ga omii – karjalakse, suomekse da vepsäkse pajattajii – äijiä puaksumbah da parembal mielel. Oma kieli da kul’tuuru vietäh iččeh puoleh. Dai tottu sanuo, konzu se kai on hyväl korgiel tazol luajittu, ga miellyt sih vie enämbäl.  Hyviä pajojoukkuo meil on. Löyhkiä sendäh voimmo. “Sattuma” on eräs – meil kaikkientiettävy, muijalgi kuulužu, hyviäluadustu da korgeitazostu muuzikkua soittai. Nämminny päivinny joukko täyttäy kymmene vuottu.

Vahnembat da lapset

“Sattuma” vikse vie on ainavo moine meil, kus yhtes pajatetah da soitetah vahnembat da lapset. Tostu mieleh ni juohtu ei. Kymmene vuottu tagaperin endizet kuulužan Myllärit-joukon muuzikot Arto Rinne da Dmitrii D’omin huavattih luadie oma joukko omien lapsienke yhtes. Eilal, Arton tyttärel, silloi oli kaksitostu vuottu igiä, Vladikal, Dmitrien poijal, vaiku 9 vuottu.

– Eibo ni petties kai roinnuh. Pohju oman joukon perustandah niškoi oli hyvä, rubieu sellittämäh Dmitrii D’omin. – Myö Myllärit-joukonke äijän soitimmo konsertois, festivualilois, äijän ajelimmo. Meijänke yhtes oldih meijän omatgi. Meijän lapset harjavuttih sih kul’tuurah, muuzikkah, eloksentabah. Sidä paiči hyö opastuttih yhtel samazel opastajal soittamah skripkal, segi yhtisti heidy. Myö kui voimmo autoimmo da nevvoimmo heidy, heijän muamat sežo käydih urokoile, kaččomah kuibo kai menöy. Pagizen perehen roulis. Sendäh nimidä kummua sit, ku meile rodih oma perehansambli, ei ole. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat