Vienan Karjala

Kirjutukset vienankarjalakse

“Minä ylbeilen vepsäläzii juurii

Jevgenija ainos avvuttau ristikanzoile, kudamah kyzytänneh hänel abuu // Kuva: Anna Fedulina

Tänä vuon meijänke yhtes yliopiston loppou meijän kursudovariššu Jevgenija Kokorina.

Vepsäläzet ollah yksi vähäluguzis suomelas-ugrilazis kanzois. Eletäh vepsät Karjalas, Voulogdan da Piiterin alovehel. Vuvves 2006 algajen vepsäläzii pietäh vähäluguzennu kanzannu. Karjalas vuvven 2010 rahvahanluvun mugah vepsäläzii on 3423 hengie. Ga yksikai monet heis tahtotah säilyttiä oma kieli da kul’tuuru tänäpäigi... On žiäli itämerensuomelazien kielen da kul’tuuran tiedokunnal (nygöi se on filolougine tiedokundu) karjalan da vepsän ozastol vuozi vuottu tulou opastumah vähembi rahvastu...Tänäpäi enzimäzel kursal opastuu vai yksi vepsäläine. Tänävuon meijänke yhtes yliopiston loppou meijän kursudovariššu Jevgenija Kokorina.

Žen’a on hyväntahtoine, tiijonhimoine, mielevy ristikanzu, ga vie paiči sidä häi ylen äijäl suvaiččou omua kanzua, omii juurii. Žen’ua kovah miellytetäh vepsäläzien perindöt. Häi uskou: hänen kanzu da kieli ruvetah kehittymäh da elämäh iellehgi.

Žen’a rodivui Šoltjärves vepsäläzes perehes. Lapsusvuozis häi kuuli vepsän kieldy, ga omal kielel rubei pagizemah, konzu jo kazvoi. Žen’an muamah Ol’ga Vasiljevna ruadau päivykois  da häi ylen hyvin maltau vepsän kieldy. Paiči muamua Žen’anke vepsän kieldy paistih buabo da died’oi. Žen’a tahtoi tulla kiändäjäkse dai piäzi opastumah itämerensuomelazien kielien da kul’tuuran tiedokunnal, gu ielleh opastuo omah kieleh. Žen’a toven on hyvä kiändäi, kui oman muamankielen mugagi suomen kielen. Žen’a suvaiččou omua kieldy da ylen hyvin pagizou vepsäkse.

- On žiäli, gu vuozi vuottu vepsäläzien lugu vähenöy... Minun mieles vepsäläzet ollah net, ket kazvettih vepsäläzes perehes da lapsusvuozis paistih omua kieldy da harjavuttih omah kul’tuurah. Net, ket vai opastutah vepsän kieleh yliopistos, ollah moločat, ga sanuo heidy vepsikse minä en voi. Minul on abei, gu puaksuh vepsäläzet da karjalazet sanotah iččie ven’alazikse, paheksiu Žen’a.

Žen’a on sidä mieldy, gu säilyttiä vepsän kieldy voi paisten niilöinke, ket iče ollah vepsäläzet da hyvin paistah omua kieldy. Pidäy suvaija omua piendy kanzua, kunnivoija sen perindölöi da harjaittua sih omii lapsii.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat