Vienan Karjala

Kirjutukset vienankarjalakse

Opastua pidäy nuorete

Mittumii vai piirualoi Alisa Petrovna ei malta pastua. Nygöi kaikkeh, midä tiedäy da maltau, häi opastau lapsii // Kuva: Ol'ga Kuzmina

Petroskoin Marjane-lapsien päivykois lapsii opastettih pastamah šipainiekkoi.

Marjane-lapsien päivykoin kazvattiiloi mondu vuottu harjaitti karjalan kieleh Alisa Petrovna Gubareva. Nygöigi häi ei unohta omii kazvattiloi, kävyy kižuamah heijänke da pidämäh erilazii master-kluassoi. Täl kerdua häi tuli opastamah lapsii pastamah šipainiekkoi. Joukos on 24 lastu, tänävuon hyö jo lähtietäh školah, karjalan kieleh heidy harjaitetah jo kolme vuottu. Enzimäi Alisa Petrovna saneli lapsil karjalazis piirualois: sul'činois, keitinpiirualois da, tiettäväine, šipainiekois. Tämän jälles kaikin otettihes ruadoh. Kuuzi- da seiččie-vuodehizet lapset tarkah kačottih, kui Alisa Petrovna luadi tahtastu. Samal aigua hyö musteltih jo tiettylöi sanoi da opastuttih uuzii. Iče Alisa Petrovna opastui pastamah šipainiekkoi, konzu oli vie pienenny. Tässäh mustau, gu stolan ual pidi panna pul’čukku, sendäh gu pienel tytöl kazvuo ei täydynyh, a pastua piirualoi istujen muamo nikonzu ei andanuh, vältämättäh pidi seizuo. Mittumii vai piirualoi Alisa Petrovna ei malta pastua. Nygöi kaikkeh, midä tiedäy da maltau, häi opastau lapsii. Hänen mugah nengomat master-kluasat ollah ylen hyövyllizet.

– Konzu lapset iče omil käzil luajitah, se on paras. Hos kui äijy heile sanele, nimittumua tolkuu ei rodei, yksikai hyö ei ruveta tiedämäh, kui se kai tulou, sanelou Alisa Petrovna, – konzu minä olin pinenny, muamo joga pyhiäpäiviä nostatti minuu aijoi huondeksel pastamah piirualoi.

Lapset iče ajeltih kjorii, pandih syväindy sego yhtistettih reunoi. Täs kaikes heidy autettih vahnembat, kuduat sežo yhtyttih master-kluassah.

– Šipainiekkoi myö pastammo kois muamanke, nygöi minä iče opastuin pastamah. Syvaičen šipainiekkoi brosan da kartohkanke, sanelou päivykoin kazvatti Angelina Fedotova.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat