Vienan Karjala

Kirjutukset vienankarjalakse

Karjalua rajan taguapäi

Kaikkiedah Eigu-ouperas on 18 artistua, pajattajua da soittajua // Kuva: Ol'ga Smortova

Pajofestivualin aigah jovensuulazet artistat ozutettih ouperu lapsile karjalan kielel.

Matkal Petroskoile artistat kävähtettihes vie Viinijärven kyläh Taipaleen valistustaloih, kudaman ižändänny on Timoi Munne. Enzi kerdua sie ozutettih ouperu karjalan kielel. Taloin zualu oli täyzi rahvastu.

– Tiijät ha, enzi kerdua meijän mustamal oli muga, ku kaččojat, konzu kengi artistois rubei ravieh pajattamah omua aariedu,  ruvettih käzii räškyttämäh. Tietty dielo, hyviä mieldy meile sendäh oli, sanelou ouperan käzikirjutuksen da muuzikan luadii Paavo Joensalo.

Allus algajen ouperu oli kirjutettu suomekse. Ohjuaju sit kiinnostui kiändämäh sidä angliekse da vuvvennu 2008 se ozutettih Irlandies Dublinas.

– Ga ainos huaveilin, eigo ken kiändäs sidä karjalakse, eestikse, vengriekse, ruočikse libo ven’akse. Kaksi vuottu tagaperin Karjalan Kielen Seura kiändyi minun puoleh da kehitti iče sen. Paavo Harakka ottavui kiändämäh ouperua karjalakse, sellittäy Paavo Joensalo.

Ohjuaju eibo ni petties tahtonuh ouperas karjalankieline. Miehel ičel on karjalazet juuret da pagizou häi karjalakse hyvin. Paavon tuattah on Suojärven čupul rodivunnuh, muamah on suistamolazii karjalazii, tundietun runonpajattajien Härgözien suguu.

– Konzu voinu algavui, minun tuatto da muamo elettih Korbiselläs. Muamo lähti evakkoh Päivänlasku-Suomeh. Tuatto kuoli 1942 pakkaskuus Karhumäin čupul. Minä kaksi nedälii myöhembi rodivuin, sendäh nikonzu en ole tuattua nähnyh. Minun muamo pagizi karjalakse, didi da baba sežo, äijät omatgi. Lapsennu opastuin karjalua, sit unohtin, sit uvvessah rubein opastumah kieldy, mustelou Paavo Joensalo...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat