Vienan Karjala

Kirjutukset vienankarjalakse

Midä pagizou meile vahnu perehkuvaine?

Meijän vahnembil da ezivahnembil ei olluh fotokameroi, vie vähembi nygyaigazien digikameroin jyttymii laittehii, kudamil ilmai kallistu fil’mua voit snimaija hos kui äijy da ravieh, duumaiččemattah. Ku tahtonet kačella omii lapsuskuvazii, niidy vaigu vähä löydyy. Tavallizesti kentah kuvai svuad’bua, kudamas äijy rahvastu on kerävynnyh yhteh kuvah venčattuloin kel. Libo muahpanendua: sie pokoiniekan avvonazen ruuhen ymbäril seizou suuri joukko suattajii, kudamis et tiijä nimii, no hyväs lykys vie tunnet da mustat ihan lähimät omahizet. Vie yksi-kaksi kuvastu löydyy, ku kodih konzutah puutui vuottamatoi gost’u: valokuvuaju, ken suurien fotoapparuatoinke kävelles talois toizeh taričči omassah palveluloi. Sit kogo pereh kerävyi yhteh, šuorihes parahih sobih, sugi tukat da istavui kuvattavakse. Kuvaine tuli konzu tuli, se pandih fotoal’bomah, kačeltih allukse puaksumbah, jälgimäi harvembah, sit jo unohtui. A mibo vie unohtui? Ei niken nimidä kirjutannuh kuvan sellityksekse: kus da konzu otettu, kedä kuvas… Jälgipolvile, ket tahtottas tiediä omas perehes da rodnis, se ollus ylen tärgei tekstaine. Nygöi, ku ei ole nikedä kel kyzellä, voit vai arbailla, ken sie kuvas on se naine kudai mustoittau vähäzel meijän tytärdy!

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat