Vienan Karjala

Kirjutukset vienankarjalakse

Lea Lihavainen: "Olen karjalaine dai suomelaine"

Lea Lihavainen on ”Oman Muan” alalline lugii // Kuva: Jelena Filippova

Jatkammo Tundemattomat karjalazet -rubriekkua. Täl kerdua meijän paginkanzannu on Suomen puolen karjalaine Lea Lihavainen.

Meil Karjalas Lea Lihavastu hyvin tundietah karjalan da suomen kielel opastajat, kielen da kanzallizen kul’tuuran alal ruadajat rahvas. Jo monien vuozien aigah Suomen Jovensuus toimii OK-opintokeskus, kudamas ruadau  inehmine, on yhteisruavos  meigäläzienke. Algu tälle yhteisruavole oli pandu vie 1990-luvul.

Täh aigah yhtehizil väil on pietty monenmostu kielikursua opastajile, vietty edehpäi opintokerho-projektua, kudaman aigah on suadu kannatustu Karjalan yhteiskunnallizet liitot omien kerholoin perustandah. Äijy on ruattu yhtes meigäläzen kanzalliskielizen tv:n toimituksenke. Yhtes luajittulois suomenkielizis ozutuksis saneltih syömizien valmistandas, savun da ogrodan ruadolois...

Lea Lihavainen ruadau opintokeskukses jo läs kahtukymmendy viitty vuottu. Kai nämä yhtehizet ruavot, kudamii luvettelin, enne kaikkie ollah hänen avul järjestetyt da pietyt. Sendäh hyvin tutah inehmisty meigäläzet rahvas.

– Ylen äijäl suvaičen omua ruaduo. Olemmo äijän ruadanuh da äijän ajelluh Karjalah. Ainos on hyviä mieldy, konzu kedätahto kursilazis vastuan. Karjalan rahvas ollah rahmannoit da ystävällizet. Ainos ku olet Karjalas, ga se matku innostau, tuou vai hyviä mieldy, sanou Lea.

Juuret Karjalas

Lean muamah on roinnuhes Salmis. Tuatto Suomes Pohjois-Karjalas Liperis. Muaman muamankieli on liygi.

– Konzu voinan aigah karjalazii työttih evakkoh, meijän perehgi tuli Suomeh. Elettih Keski-Suomes. Lähäl eläjiä livgilästy perehty ei olluh, sendäh muaman kieli muutui suomekse. Da viehäi kai školat da ruavot oldih suomekse, sendäh livvikse muamo pagizi vai omienke. Hyvin mustan vie buaban paginat. Häi ainos pagizi livvikse. Lapsennu händy kuundelin, sendäh sain passiivizen sanavaraston. Nygöi konzu luven karjalakse libo pagizen karjalazienke, ga enimän ellendän. Konzu midägi en ellendä, ga minul on sanakniigat, niidy kačon. Da ainoshäi voin muamal kyzyö, mibo se libo nualoi sanoi on, sellittäy inehmine.

Lean buabah oli kui kai karjalazet inehmizet. Tiezi äijän tarinua karjalakse, pajatti omal kielel, lugi malitut livvikse...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat