Vienan Karjala

Kirjutukset vienankarjalakse

Huogavujes opastummo

Šipainiekoin pastamizen master-kluassu piettih Alavozen lähäl olijas hierus – Jeroilas. Taloin emändy Kuzmina Anna Vasiljevna saneli tyttölöile, kui pidäy luadie tahtastu, ajella kuorii, panna syväindy da yhtistiä reunoi. // Kuva: Ol'ga Kuzmina

Tänävuon Anuksen piirin Alavozen školan tyves järjestettih etnokul'tuuruleiri

Kezäloman aigah monet lapset huogavutah kezäleirilöis, ket vallitah Karjalan leiritgo, ket kävväh huogavumah tazavallan ulgopuolele. Nämmien leirilöin ližäkse on vie školaleirilöi. Tänävuon Anuksen piirin Alavozen školas järjestettih kolme erilastu leirii: algukluasoin opastujih niškoi, ekolougine sego etnokul’tuuruleirit, kuduat yhtistettih 80 lastu.

Pidäy sanuo, gu etnokul’tuuruleiri piettih enzi kerdua, sih kävyi 20 lastu.

Kaikkiedah školas karjalan kieleh opastuu piäl 200 lastu. Alavoine-nimine etnokul’tuuruleiri kesti viizi päiviä, sen ohjelmu oli monipuoline. Lapset suadih äijän uuttu tieduo omas kodirannas da Alavozen neroniekois, kudualoin keskes ollah venehien luadijat, kudojat, perindöllizien tyttilöin luadijat sego villan vanuttajat.

Mittuinebo leiri voi olla ilmai kižoi? Lapset kižattih kui jo tiettylöih karjalazih da stolakižoih, mugai opastuttih kižuamah gr’uuhah, sih niškoi školah suadih kižapualikat da gr’uuhat.

Šipainiekoin pastamizen master-kluassu piettih Alavozen lähäl olijas hierus – Jeroilas. Taloin emändy Anna Vasiljevna Kuzmina saneli tyttölöile, kui pidäy luadie tahtastu, ajella kuorii, panna syväindy da yhtistiä reunoi. Kuni šipainiekat pastuttih päčis da samvuaru kiehui, Anna Vasiljevna ozutti lapsile omua taloidu sego saneli, kui karjalazet elettih enne.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat