Vienan Karjala

Kirjutukset vienankarjalakse

Kel on kyven sydämes

Marin tazavallan kanzalline artistu Zoja Bernikova ”Oman Muan” toimitukses olles allekirjutti meile oman afišan da lahjoitti pajodiskan ”Muro alan” – ”Pajotaido”. // Kuva: Jelena Filippova

Eeppizen fouruman aigah Karjalah on käynnyh pajattajua da tansijua monis Ven’an suomelas-ugrilazis alovehis da mualois. Oli Marispäigi tulluttu artistua. Eräs marilaine pajattai Zoja Bernikova, kanzalline artistu, puutui paginale ”Oman Muan” toimtukseh.

- Olen Karjalas jo tostu kerdua. Enzimästy kerdua käin vuvvennu 1986, sežo pajattamas olin yhtes oman Mari-El -pajojoukon kel. Teijän linnas da kogo Karjalas äijy on muuttunuh, on nostettu mostu čomua da hyviä taloidu. Käimmö Kondupohjah pajattamah, toinah ongo sie čomat da hyvät zualat.

Zoja Bernikova ruadau Mari-El-ansamblis vuvves 1979. Nuorennu tytönny häi ruadoi kezriäjänny. Jamai-Sola -kyläs (jamai on joven nimi, sola – kylä marin kieleh. – toim.) kazvanuh neidine pahaspienyössäh suvaičči pajattua, sendäh lähtigi opastumah kul’tuuranopiston. Zojan perehes tuatto soitti soitol, muamo pajatti ylen hyvin, dai hyö, kolmet sizärekset, ainos pajatettih.

- Meijän ansambli oli perustettu vuvvennu 1939. Se oli pajon da tansin valdivolline anzambli. Vuvves 1982 se muutettih tansin ansamblikse, ga yhtelläh pajattajua da soittajua sih yksikai on jiännyh. Tansijat tansitah, orkestru soittau, myö pajatammo. Nygöi Mari-El-ansamblis on 45 hengie.

Mari-Elan tazavallas kanzallizes kul´tuuras pietäh huoldu. Tädägi ansamblii auttau da elättäy valdivo, yhtelläh artistat ičegi suajah dengua.

- Myö äijän ajelemmo Marin tazavaldua myöte, pajatammo da tansimmo školis, lapsien päivykodilois. Sen vuoh suammo dengua. Ga on meil konsertua, kudamii piemmö ilmai. Toiči myö kävymmö tazavallan ulgopuolele omua neruo ozuttamah.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat