Vienan Karjala

Kirjutukset vienankarjalakse

Hyviä matkua Jovensuuh!

Autobussu ku rubei käymäh Jovensuuh, ga myö, “Oman Muan” toimittajat, toinah nygöi puaksumbah piäzemmö Jovensuuh karjalazien pidoloih, niidyhäi rajan tagua sežo pietäh äijy. // Kuva: Il’l’u Mošnikov

Ajelin Jovensuuh 2. elokuudu, silloi, konzu autobussu enzi kerdua oli työtty. Pidäy sanuo, matku meni hyvin. Uuzi nygyaigaine autobussu on tänävuon juuri nämmih matkoih niškoi ostettu. Autobusas on hiilavua da viluu vetty juvva, käymäl, televiizoru, hyvät konditsionierat da WI-FI kai, kelle pidänöy ainos internettu käin ual.

Hyvä puoli on se, ku on autobusan tarkat lähtö- da tuloaijat. Petroskoispäi se lähtöy 5.30 aigua da tulou Jovensuuh 11.00 Suomen aigua. Jovensuuspäi järilleh lähtöy 17.00 Suomen aigua da on Petroskois 00.30 meijän aigua. Ei pie huolie sidä, konzu piäzet paikan piäle, kui ainos on, konzu ajelet taksil. Dai lipun hindu on ylen pädii, 20 eruo yhteh puoleh. Ei äijiä. Segi hyvä on: Petroskoin avtovokzualal kerras voibi ostua liput Jovensuuspäi Helsinkih, Kuopioh, Jyväskyläh. Jovensuus ei ni hätkie mene niilöi autobussoi vuottajes.

Matkan aigua autobussu azettuu mondu kerdua, rahvas voijah lähtie pihale, liikkuo vähäzel. Pidäs ku vai nenne azetandat jo oldas tietyt da tiettylöis kylis, ku nämmiengi kylien rahvas piästäs, ku tahtotanneh vai, Suomeh dai Suomespäi. Priäžän, Nuožarven, Vieljärven, Kolatsellän rahvas smietin sežo käydäs täl autobusal rajan tuakse.

Midä koskou rajal tarkastandua, ga se ylen terväh menöy. Autobusan matkustajien dokumentoi kačotah piädykauti erikseh, sih niškoi ruadau kaksi hengie.

Jovensuus autobussu azettuu kolme kerdua, avtovokzualal, keskučas da Prizmalluo. Järilleh ajajesgi ezmäi otetag rahvastu avtovokzualal, sit keskučas, sit jongoi Prizmalluo. Niilöile, ket lähtietäh ostoksile, se on aiga hyvä. Dai voibi Jovensuuh kävvä päiväkse, ku vai kuvves čuasus ehtinet ruadua kai omat ruavot. Libo tossupiän lähtie järilleh, autobussuhäi rubieu käymäh kolme kerdua nedälis, nellänpiän, suovattan da pyhänpiän.

Petroskoih autobussu tulou puolen yön aigah 00.30. Konzu enzi kerdua ajoimmo, ga se matkai Drevl’ankan, Kukoinmäin kauti, Kalininan, Nevskoin da Krasnoarmeiskaja-pihoin kauti avtovokzualale. Tulou myöhättäväh, nigo autobusat, nigo trolleibusat sil aigua jo ei kävvä, sendäh edukädeh pidäy kuččuo taksi libo olla vastuajat, ku et jiäs vokzualan pihale pimies kokottamah da vuottamah, kuni taksi tulou. Niilöihäi huogavopäivin yöl tulou hätki vuottua. Dai huondeksel edukädeh pidäy huolie se, kui piäzet avtovokuzualal. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat