Vienan Karjala

Kirjutukset vienankarjalakse

Kalastamah maksosgo?

Ven’an Valdivon Duumu tuaste työndi kohendettavakse zakonanprojektan himokalastukseh näh. Kaksi vuottu tagaperin zakonanprojektua vastah nostih kai Ven’an kalastajat. Heidy suututti maksolline kalastus. Yhtelläh kahten vuvven mendyy kai jäi endizelleh. Uvven zakonanprojektan mugah valdivo andau biznesmiehile vallan ottua rahvahal jengua kalastamizes erähil järvilöil da jogiloil.

Zakonanprojektas himokalastukseh näh on kirjutettu, ku kymmene protsentua joga alovehen vezistös pidäy andua muga sanottuh rekreatsiikäyttöh. Tälleh viizahasti valdivo peittäy maksollizen kalastuksen.

‒ Karjalas täh kymmeneh protsentah voijah ottua parahat kalastuskohtat. Midä sie roih, myö emmo tiijä, pahakse mieldy, sanou Karjalan kalastajien kluubah kuuluju Jevgeni Bel’ančikov.

Mene tiijä, a gu maksollizil järvilöil da jogiloil rahvahal tulou maksua ei vai verkon piendäs da uistimen viendäs, ga ongitandasgi. Vieljärven Jyrgiläs eläjät Mihail Beresnev da Vasilii Mihailov ijän on pyvvetty kalua Vieljärven järvel:

‒ Ei pie maksua, ku ongeh pyydänet. Myö olemmo sidä vastah. Kuibo nygöi rannal eliä da kalastamattah olla.

Verkoloin piendy Vieljärven järvel kiellettih kaksi vuottu tagaperin, sen periä tiä enämbän ustitetah haugii da kuhua kui paikallizet, mugai linnalazet kalaniekat. Jo piätteniččän illal järvel on sagenah kaikenalastu rezinmotorkuvenehty. Monil paikallizil kalastus ei ole vai aijanvietto, ga särbimen suandu. Yhtelläh vuozi vuottu vähenöy kalua järves. Vie viizi-kuuzi vuottu tagaperin puutui 5-6-7-kilohistu kuhua. Nygöi suahah enimytteh vajai kilohizii. Rahvas ei oldas vastah kalastuslubien ostamistu.

‒ Štobi verko panna, štobi vediä uistindu, sih pidäy luadie litsenzii, kui oli vuottu kolme-nelli tagaperin kaikes meijän tazavallas. Štobi rahvas ei varuas panna verkon, yhten libo kaksi, on varmu jyrgil’čy P’otr Iljin. ‒ A muite uistimeh suahah enämbän, mi gu verkoloih, 20-30 palua yhtes yös otetah. Sit järvi köyhtyy čiisto. Nenga ei sua luadie. Vuottu viizi vie, sit Vieljärves ei rodei ni yhty kuhua.

Kalastajan mieles pidäy kogonah kieldiä puaksut verkot, ga andua luba rahvahal pidiä harvoi, kus silmy on 80 millimetrii vähimikse. Kymmenen vuvven peräs jo kalua liženis, vois andua luba laskie hienombua verkuo. Ahvenien pyvvändäh vois andua luba panna 30-millimetrihizii verkoloi...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat