Vienan Karjala

Kirjutukset vienankarjalakse

“NOID” avuau rock-festivualin

Vepsäläine folk-joukko “NOID” rubieu pajattamah Vozduh-festivualis

Tämänvuodehizen festivualin avuau vepsäläine pajojoukko “Noid”. Pidäy sanuo, ku “Vozduhal” enne ylen harvah kuului Karjalan kanzallizii kielii. Mustoh juohtuu onnuako vaigu Myllärit-joukko. Heijän “Ongo Petroskoi” soitti kerran jälgimäzenny, konzu myöhä illal rahvas jo oldih lähtemäs festivualispäi.

– Festivualih tulou lähes kymmendy Karjalan pajojoukkuo, ga vai kolme niilöis ruvetah pajattamah festivualin piälimäzel laval, niilöin joukos myögi, sendäh meile on hyviä mieldy. Sen ližäkse myö avuammogi tämän festivualin, sanou “NOID:an” piälimäine Vladimir Solovjov. – Ongo kebjei piästä kanzalliskielizel pajojoukol moizeh festivualih, en malta sanuo. Enzi kerdua opimmo pyrgiekseh sih dai piäzimmö.

Mindäh sit Ven’an suures rock-festivualis, kudai pietäh Karjalas, muga harvah puuttuu kuulta Karjalan kandurahvahien muamankieldy. Tullou festivualih kymmenii tuhanzii rahvastu kogo Ven’alpäi, anna kuultah pajo-toine karjalakse da vepsäkse, kusbo hyö vie kuultah meijän kielii…

– Mindäh muga harvah festivualis ezitytäh kanzallizet pajojoukot, se parembi olis kyzyö festivualin järjestäjil. Toinah meijän joukot ei kuuluta rock-festivualin formuattah… Yhtelläh ylen hyvä on, ku täl kerdua järjestäjät ližättih “Vozduhah” kanzallistu kul’tuuruagi. Uskon, ku meijän folk-joukon ezitys vepsän kielel rodieu mieleh rock-muuzikangi suvaiččijoile, opimmo staraijakseh sih niškoi. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat