Vienan Karjala

Kirjutukset vienankarjalakse

Mustua da kunnivoija omii

Jegorovan uuličal enzimäine nimilaudu karjalakse iškiettih Anatolii Brendojevan taloih // Kuva: Jelena Migunova

Tämä festivuali oli jo kolmastostu. Sidä allus algajen pidäy Anuksenlinnan rahvahalline kirjasto. Vuozien aloh sih ruadoh yhtyi linnan yhteiskunnalline järjestö ”Anuksen karjalažet”. Yhtehizil väil ruvettih valmistamah sidä da edehpäi livuttamah karjalazien kul’tuurua da kieldy.

Tämän vuvven festivuali algavui miitingas Jegorovan pihal. ”Anuksen karjalažet” luajitutettih tämän uuličan joga taloile nimilavvat, kudamih on kirjutettu uuličan nimi karjalakse da taloin noumer. Linnas tämä on jo kolmas uuličču, kudamal on nimilaudua karjalakse. Ennepäi moizet nimilavvat oli azetettu Anastasija Zvezdinan da P’otr Studitovan uuličal. Hyö mollembat oldih anukselazet. Anastasija Zvezdina oli voinan urhoi, hänes, nuores neičykäs, kudai voinan aigah otettih kiini da ammuttih, kirjuttau ”Kadajikos” Vladimir Brendojev. P’otr Studitov oli avuamas Anuksen rannale bolniččua.

Filipp Ivanovič Jegorov sežo oli anukselaine. Rodiihes Hittoilan kyläs, oli kolmel voinal, kahtel muailman voinal da talvivoinal. Mies oli nelli vuottu Kodialovehen muzein johtajannu Petroskoil. Vuozil 1970 tuli Anukseh. Hänen kehitykses linnas ruvettih luadimah omua muzeidu, keriämäh sih niškoi vehkehty da materjualua. Jegorovan uuličale annettih oma nimi vie konzu Filipp Ivanovič oli elos.

- Enzimäzet taloit tälle uuličale nosti meččylaitos omile ruadajile. Sit nostettih barakat, kus elettih saldatat, lendäjät, kudamat sluužittih Nurmoilas. Tänäpäi täl hil’l’azel uuličal on onnuako 40 kodii. Joga koile azetammo nimilavvan. Enzimäzen iškemmö Anatolii Brendojevan kodih. Se on enzimäzii omii kodiloi täl uuličal. Täh kodih puaksuh kävyi Vladimir Brendojev, Anatolii Vasiljevič oli oma runoilijale. Brendojevan roindupiän sit ei vai yksil sanoil, ga dielolgi ozutammo, ku mustammo omii juurii da omua histouriedu, saneli Inga Gurilova, Družba-laitoksen piälikkö.

Kaikkiedah Anukses on nelli uuliččua, kudamile on annettu anukselazien nimet. Setämä vuozi tagaperin linnas rodih Vladimir Brendojevan uuličču, ga sil tänäpiän on vie vai yksi kodi.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat