Vienan Karjala

Kirjutukset vienankarjalakse

Luadogan hengitys

Jurii Lumpijev ozuttau omah jälgimäzekse luajittuh fotokuvahpäi. Kuvas on oravaine, kudaman häi ehti kuvata mečäs griibua kerätes. // Kuva: Ol'ga Smortova

 

Kanzallizien kul’tuuroin keskukses avavui Jurii Lumpijevan da Anatolii Čebotar’ovan fotokuvien ozuttelu “Luadogan hengitys”.

Ozutteluh on pandu kačottavakse lähes kuuttukymmendy lähiaijal luajittuu fotokuvua. Anukselazen fotografan Jurii Lumpijevan kuvat on luajittu Luadogan čupul. Niilöis voibi nähtä linduloi, meččyelättilöi da luonduo. Jurii Lumpijevan nimi on hyvin tuttu Anuksen čupul: händy tietäh nerokkahannu “fotomečästäjänny”. Hänen ruadodovariššuhäi Anatolii Čebotar’ov on varmu, ku Lumbijev on ainavo “fotomečästäi” kogo Karjalas.

– Ongo neruo kuvata hyybien, kudai nouzou lendoh päivänvalgiel. Net linnuthäi muatah päiväl, paistih rahvas keskenäh Jurii Lumpijevan luajittuloi kuvii kaččojes.

Iče fotokuvuaju sellittäy, ku ylen harvah kävyy “mečästämäh” päiväl. Häi lähtöy fotografiiruimah aijoi huondeksel, 5-6 čuasun aigah libo ehtypuolel, 8 čuasul.

– Yhten kuvan voibi čuasun aigah luadie, toizen – nedälin aigah, kolmattu toinah ni vuvven aigah ei lykystä luadie, sanou Jurii Lumpijev. – Net kuvat, kudamii en maltanuh luadie tänä vuon, luajin tulien vuon, on varmu fotograffu.

Anatolii Čebotar’ov, kui Jurii Lumpijevgi kuuluu Olonija-fotokluubah. Čebotar’ov suvaiččou fotografiiruija da on varmu, ku meijän elaigu on moine mieldykiinnittäi, ku sidä voibi kuvata loppumattah. Ozutteluh fotograffu toi lähes kolmiekymmendy fotokuvua, kudamat luadi Vieljärven kyläs. Kuvis on Vieljärven rahvastu, kylän neroniekkua, niilöin joukos ollah Ol’ga Samsonova, kudai maltau kaikenmoizii käziruadoloi, venehien luadii V’ačeslav Jegorov, poimiččuloin luadii Viktor Lesonen, kirvesmies Ivan Fotejev da toizii muasteriloi.  

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat