Vienan Karjala

Kirjutukset vienankarjalakse

On himo kirjuttua

Jaana Žemoitelite kirjuttau rakkahuos // Kuva: Ol'ga Kuzmina

Päivänvalgien nägi Karjalan tundietun kirjuttajan Jaana Žemoiteliten Lähäl ruajuu- kniigu.

 

Kniigah on kerätty jälgimäzien läs nellän vuvven aigah kirjutetut pienet romuanat, kerdomukset sego esseet, kaikkiedah niidy on kaksikymmen. Kai tevokset sanellah kui Jaanan mugai hänen tuttavienke tapahtunnuzis histourielois.

‒ Enzimäzien lugijoin sanoin mugah kai nämmä tevokset kerrotah hyvis ristikanzois: tavallizis kirjaston hoidajis, ruadajis, opastajis da muga ielleh. Kerdomuksien pohjannu ollah elaijan tapahtumat, yhtelläh net ei voidu olla samas muvvos, kui oli elaijas, minä sanelen niilöis oman nägemyksen mugah. Kerdomus nikonzu ei toista elaigua, se on äijiä elävembi da syvembi, migu iče elaigu, sanelou Jaana Žemoitelite.

Oman enzimäzen kerdomuksen Jaana Žemoitelite kirjutti vuonnu 1990 da toi sen Carelia-žurnualan toimitukseh. Monet Jaanan tevokset sanellah rakkahuos. Iče kirjuttajan mugah kirjuttamizeh händy kuhkuttau vačan tusku.

‒ Ilmai tuskua ei tule nimidä, puaksuh rakkahusruno rodivuu, konzu rakkahus kuolou, en tiijä, mindäh nenga tapahtuu, kirjuttua runoloi ozakkahas rakkahuos on ylen vaigei, sanelou kirjuttai.

Kniigan nimi “Lähäl ruajuu” on annettu erähän kerdomuksen mugah. Sen Jaana kirjutti, konzu tazavallan arhiivas valmistui Karjalan rahvahallizen kirjaston 180-vuozipäiväh. “Lähäl ruajuu” on rakkahuskerdomus, se sanelou kirjaston hoidajan da zavodan ruadajan traagizes rakkahuos, kudai oli vuonnu 1927 Petroskois. Paiči kerdomuksii Jaana Žemoitelite kirjuttau runoloi, lehtikirjutuksii sego ozutelmien tekstoi. Häi iče sanoi, gu äijäl suvaiččou rahvahan teatroi, sendäh gu net ollah kingieh sivotut kylän elaigah. Jo mondu vuottu Jaana ruadau yhtes karjalankielizen Čičiliušku-nimizen tyttiteatranke. Kniigan prezentatsiekse čičiliuškulazet valmistettih pienen ozutuksen, kuduan pohjannu oldih Jaana Žemoiteliten tevokset...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat