Vienan Karjala

Kirjutukset vienankarjalakse

Pehmei sydämel ̶ kova ruadoh

Enin aigua Anna Vasiljevna eläy Särgilahtes, veikoin Dubininan kois // Kuva: Ivan Savin

Tuaste puutui kävähtiäkseh omah lembikyläh, tozi karjalazeh - Särgilahteh. Vastavuin tuttavien kel, kävähtimmös endizeh Lesnaja skazka -luagerih, nygöi sen nimi on vai muutettu nygyaigazeh Karelija-Open!
Enimät vahnat keski-igäzet kyläläzet: Tupitsinat, Česnokovat , Fominat, Mihailovat paistah kui keskenäh, mugai tulolazien kel omal karjalan kielel. Ga kaikilluo yhtes päiväs et kergie kävvä, sendäh enimän aigua vietimmö Anna Vasiljevna Kourunke. Täs naizesgi tahtoizin sanella enämbän. Rahmannoi hyväsydämelline Anna Vasiljevna vastai meidy lämmien piirualoin kel da hiilaval čuajul.

Monii vuozii tagaperin inehmine sai hyvät tehniekkytiijot ammattiopistos n:o 1, Petroskoin valdivonyliopistos sai Meččymašinoin inženieran diploman. Kolmekymmen vuottu häi ruadoi Onieguzavodal da eli Petroskoil , ga mieles ainos pidi omua kodirandua - piendy kyliä Paušoilua, Suuren Siämärven rannal. Joga huogavopäiviä vietti muamoušinas. Kymmeniezen vuottu Anna Vasiljevna  pajatti Oma Pajo -horas. Nygöi enin aigua on Särgilahtes, veikoin Dubininan kois. Kyläs eläjes Anna Vasiljevna  kai väit panou karjalan kielen elävyttämizeh, sen kunnivos piendäs da kannatukseh.
Kyläh linnoispäi tulluot lapset jo ei paista muamankieldy, muga ollah ven’avunnuot, ga tietäh sen olendas. Anna Vasiljevna oppiu kezän aigua keräillä heidy joukkozih da äijän vähän sanella heile omas kieles. Opastau heidy tiedämäh karjalazii sanoi – lapsil on himo tiediä omien muamoloin kieli. Hyö paheksitah, gu enimis školis karjalan kieldy ei opasteta ni vouse, erähis on vai yksi čuassu nedälis. Äijät lapset  tahtottasgi tiediä karjalan kieldy, ga  vai ei tietä kus sidä opastetah. Eigo se olis valdivon hommu! Ei nägyy herrat ylen äijäl huolehtita rahvahan probleemoi. A Anna Vasiljevnan jyttymii olis gu enäm meijän kylis...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat