Vienan Karjala

Kirjutukset vienankarjalakse

Älgiä andakkua tuldu, agu syttyy

Pohjazen, Siberin da Loittozen päivännouzupuolen kandukanzoin nevvoston käskys Pohjazen uskolližus –medälit suadih Vepsän kul’tursebr-liiton piälikkö Zinaida Strogal’ščikova da Šoltarven muzein piälikkö Natalja Anhimova

Mennyt nedälil, nellänpiän piettih vuoronmugaine Karjalazien, vepsäläzien da suomelazien edustajien nevvoston istundo.

Sen piälikkyö Aleksandr Hudilastu ei olluh pivos, istundon paginanvedäjänny oli Karjalan tazavallan Tervehyön da sotsiokehityksen ministru Valentina Ulič.

Allus istunduo oli medaliloin juandu. Pohjazen, Siberin da Loittozen päivännouzupuolen kandukanzoin nevvoston käskys Valentina Ulič andoi Pohjazen uskolližus –medälit kahtele vepsäläzele. Net suadih Vepsän kul’tursebr-liiton piälikkö Zinaida Strogal’ščikova da Šoltarven muzein piälikkö Natalja Anhimova.

Säilyttiä mennytty tulien polven hyväkse

Nevvoston istundos Irma Mullonen saneli hänen piän al ruadajas Kielen, Literatuuran da histourien instituutas.

- Meijän ruadajis 20 ruatah sidä ruaduo, mi oigieh  koskou karjalazii, vepsäläzii da suomelazii. Konzu meijän instituuttu pidi omua 75-vuozipäiviä, myö luvimmo, ku täs aijas on piästetty ilmah tuhat palua kniigua. Sit aijas on mennyh vie kymmene vuottu da joga vuottu meil piäzöy kymmenin kniigoin, kerdoi Irma Mullonen.

Instituutan piälikön sanoin mugah tiedomiehet paiči tutkimusruaduo kirjutetah iče da autetah valmistua erilazii dokumentoi, kuduat koskietah karjalazien, vepsäläzien da suomelazien oigevuksii da puolistamistu.

Irma Mullonen sanoi, ku jälgiaigua Instituutas ruadau fonogramarhiivu, kuduas ruokos on nelli tuhattu čuassuu kirjutustu – pajot, suarnat, luvut, tiedovuot, joijut, itkuvirret. Nygöi Kielen, literatuuran da histourien instituuttu suau varua Kanzallizen poliitiekan ministerstvan kauti, hyö kirjutetah uvvessah da pannah ruokkoh endizii, vahnoi audiokirjutuksii, kudamii instituutas piettih jo lähes 40 vuottu da kuduat ilmai sidä hävitäh.

Irma Mullostu äijäl huolestuttau Tiedoakadeemien ”uvvistamine”:

- Nikel ”uvvistajis” ei ole tiettyy kandua, kui se pidäy ruadua da mittuine tulos roihes. Se, midä tänäpäi näimmö, ozuttau, ku gumanitaarine tiedo vältämättäh häviey mostu ruaduo pidäjes.

Mullonen verdai Karjalan Tiedokeskuksen Kielen, literatuuran da histourien insituuttua da Mordovies olijua tutkimusinstituuttua:

- Myö suammo varua Moskovaspäi, Mordouvien paikalline instituuttu omas tazavallas. Ellendän, ku Karjalas nygöi on vaigei tila da äijy probliemua, ga toizien tazavalloin kogemustu vois tutkie, pidi varmuttu Mullonen.

Meile ei sua ruohtie andua tuuldu

Tulien vuon 20 vuottu täyttäjän ”Nuoren Karjalan” ruavos saneli sen piälikkö Alina Čuburova. Liittoh nygöi kuuluu lähes 300 hengie. Heijän suurembii projektoi ollah ”Suomelas-ugrilazen nuorižon tulien aijan paja”, kanzalliskielizen muuzikan DVD-diskat, etnoillačut ”Ropivo” da ”Lembi”, Cičiliušku-tyttiteatru da äijät muut.

- Mennyt vuon meidy karkoitettih meijän tilois Puškinskaja-pihal. Nygöi kai meijän ”kuntut-muntut” – nelli tuhattu kirjua, diskua – ollah levälleh ”Periodikas”. Opimmo kirjuttua meijän probliemas erilazih ministerstvoih, Karjalan piämiehele Aleksandr Hudilazele, ga dielo ei eisty, paheksi Alina Čuburova.

Pahua mieldy on nuorikarjalazil sen periä, ku heidy enzimäi kirjutettih Olimpiiskoin tulen kandajien joukkoh, ga sit siepäi otettih iäres...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat