Vienan Karjala

Kirjutukset vienankarjalakse

Säilyttiä muamankieldy eri tavoin

Pasanen pidi luvenduo Suomelas-ugrilazet kielet da kul’tuuru alguopastukses -nimizen ven’alas-suomelazen projektan hantuzis Petroskois opastajien jatko-opastuksen instituutas. // Kuva: Ol'ga Kuzmina

Suomen tutkijan Annika Pasazen luvendon tiemannu oli Kielen revitalizatsii muailman kielien kannalpäi kaččojen.

Suomelas-ugrilazet kielet da kul’tuuru alguopastukses -nimizen ven’alas-suomelazen projektan hantuzis Petroskois opastajien jatko-opastuksen instituutas piettih Suomen tutkijan Annika Pasazen luvendo. Sen tiemannu oli Kielen revitalizatsii muailman kielien kannalpäi kaččojen da häviemäs olijoin kielien tila. Kuundelemah Annika Pasastu kerävyi täyzi zualu rahvastu. Heijän keskes oldih lapsien kazvattajat, opastajat, Petroskoin valdivonyliopiston filolougien tiedokunnan opastujat, žurnalistat sego monet toizet, kedä huolestuttau oman muamankielen säilyttämine. Jo mondu vuottu Annika Pasanen tutkiu muailman vähembistökielien tilua. Tänäpäi Ven’al piäl 130 kieldy ollah häviemäs, kogo muailmas moizii kielii on äijiä enämbi. Kielen tutkijoin sanoin mugah vuodessah 2100 hävitä voijah puolet kaikis muailman kielis.

‒ Vähembistökielien elävyttämizes tärgei on vastata nygyaigua, vähembistökielii ei sua pidiä muzein vahnannu ozutteluezinehinnu da kačella niilöi histourien kannalpäi. Nämmä kielet pidäy tuvva nygypäiväh. Tänäpäi kielen käyttämizeh äijäl vaikutetah linnan eländyolot sego nuorižokul’tuuru, sanelou Annika Pasanen.

Annika Pasanen on kielen tutkii, Helsinkin yliopiston doktorantu, mondu vuottu tutkiu saamen kieldy Suomen Pohjasozas. Hänen väitöskirjan tiemannu on inarisaamen kielen elävyttämine. Tämä on yksi pienimis saamen kielis, sil pagizou vai läs 350 hengie. Annika Pasazen sanoin mugah vähembistökielien säilyttämizes hyvin voijah auttua kielipezät sego intensiivukursit aiguzile.

– Ezimerkikse, Inaris, kus minä iče elän, joga vuottu pietäh opastuskursiloi aiguzile. Kogo vuvven hyö ei kävvä ruadoh, kursiloil paistah vai inarisaamekse. Tämä on tozi effektiivine kielen säilyttämizen keino. Gu Karjalasgi olis moine mahto järjestiä tämänmoizet kursat, uskon, gu karjalan, suomen da vepsän kielil pagizijua olis äijiä enämbi...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat