Kyykkä-kižua mainostetah

Tämä vuozi Karjalan Rahvahan Liitol on tärgei, järjestö täyttäy kaksikymmenviizi vuottu. Tämän merkitapahtuman hantuzis vuvven aigah pietäh äijy erilastu piduo. Enzimäzekse niilöis tuli Kyykkä-kižan mainosvideon prezentatsii. Enzimäzinny tämän videon nähtih Paginkanzu-kluubah kävyjät. Video luajittih Myö – karjalazet -projektan hantuzis. Käzikirjutuksen valmisti Natalja Vorobei, kuvuajannu oli Boris Kasjanov, pajon muuzikan da sanat kirjutti Karjalan tundiettu rock-muzikantu Santtu Karhu. Kyykkä-video kuvattih talvel, sil kižuajat tahtottih ozuttua, gu karjalazet ei varata nigo lundu, nigo tuuldu, nigo kovii pakkazii, hyö ollah valmehet kižuamah joga siäl.

– Myö tämän videon panemmo internettah sotsiualuverkoloin sivuloil, sen ližäkse sidä ruvetah ozuttamah linnan avtobusois Maršrut-TV:n kauti. Uskommo, gu tämän mainosvideon avul rahvas tiijustetah enämbän vahnas karjalazes kyykkä-kižas da kyykkäh kižuajien miäry rubieu kazvamah, sanelou Natalja Vorobei...