Vienan Karjala

Kirjutukset vienankarjalakse

Uuzi filosoufien magistru on karjalaine

Il’l’u Mošnikov tahtou ielleh tutkie karjalan kieldy.

Itä-Suomen yliopiston filosofizen tiedokunnan magistroin tovestuksien suandutapahtumas kuului karjalan kieldy.

Uuzi filosoufien magistru, uutjärveläine liygiläine Il’l’u Mošnikov pidi paginua suomekse, ga siirdyi livvinkarjalah  passiboimah perehty – muamua da vellie, kuduat oldih zualas. Velli Pavel sezo rodih magistrakse. Muamo Olga voi olla ylbei mollembas poijas. Hyviä mieldy saimmo kaikin sie olijat kylläl. Jo jälles tädä pruazniekkua minule tuli mieleh pagizuttua  Il’l’ua elaijas, opastundas, omis juurilois, perehes da tulies aijas.

Kus sinä olet roinnuhes? Kusbo mendih sinun lapsusvuvvet?

– Olen roinnuhes Tverin alovehel, ga vie olin pieni, konzu tulimmo elämäh Karjalah, Uutjärveh da Kotkatjärveh. Minul oldih parahat lapsusvuvvet. Lapsennu terväh opastuin pagizemah karjalakse, sendäh gu mama da baba keskenäh da meile paistih karjalua. Lapsennu kai kezät meijän pereh oli Uutjärves, talvel joga nedälinloppuu sežo olimmo ainos hierus. Hierus elät omua elaigua: kodiruadoloi ruadajes, meččäh muarjah da sieneh kävves, järvel kalastajes. Rahvas tuldih kezäkse hieruh, ei olluh atkal. Oli kylläl muudu lastu, sit niilöinke elostimmo da kižaimmo, olimmo yhtes. Yhtelläh ainos vuotin, konzu piäzizin školah.

Mustele vähäine školua. Oligo sie karjalan kielen urokkoi?

– Meil oldih karjalan kielen urokat školas, minä kävyin vie karjalan kielen kerhoh da myöhembä karjalan kielen fakul’tatiivale. Mustan, gu luajiimmo karjalankielizii raadivo- da tv-ohjelmii, karjalankielisty lehtie. Kezäl puutui olla karjalankielizes Livvin linduzet -luageris. Olen ylen ylbei sit, gu minun aigua školas oldih karjalan, suomen dai anglien kielen urokat. Kielien opastundu kehittäy ristikanzua parembah luaduh, andau mahton tuttavuo eri kul’tuuroih da perindölöih. 

Midä olis omas perehes sanottavua?

– Perehes tahtozin sanuo sen, gu myö ylen äijäl zobotimmo da suvaičemmo toine tostu, piemmö toine toizes huoldu. Buabo da mama opastettih meidy pagizemah karjalakse, elämäh karjalazien tabah. Kielel on da oli ainos ylen tärgei merkičys. Maman hyvä sana avvuttau ainos...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat