Vienan Karjala

Kirjutukset vienankarjalakse

Karjalazii kazvattamas

Pyhänpäivän kielipezän kazvatit roittih toine toizele hyvikse dovarišoikse // Kuva: Ol'ga Smotrova

Mennyt pyhänpiän Karjalan Rahvahan Liiton Myö karjalazet-projektah kuului Pyhänpäivän kielipezä-kluubu pidi jälgimäzen vastavuksen.

Kluubu algoi oman ruavon tuhukuus. Joga pyhäpäiviä 11 lastu da heijän vahnembua kerryttih Art-Slobodan tiloih pidämäh iluo karjalan kielel.

– Keräimmö  yhteh lapsii, kudamienke kois vahnembat paistah karjalan kielel. Niidy kerdyi äijy-vähä 11 hengie: liygilästy, vienalastu da tverinkarjalastu. Projektan tarkoituksennu oli ozuttua lapsile, ku paiči muamua da tuattua vie toizetgi lapset da vahnembat paistah karjalua, sellittäy kluuban ruaduo KRL:n piälikkö Jelena Migunova.

Kai kluuban vastavukset piettih karjalan kielel. Lapset ruattih lapsien ruaduo: kižattih, elostettih, mualattih, kačottih tyttispektaklii da mul’tiekkoi karjalan kielel, pajatettih, luajittih kaikenmoizii luajilmuksii bumuagas, plastilinas. Projektan hantuzis heih niškoi oli ostettu bovat, mujut, plastilinat, bumuagat. Vahnembile löydyi ruaduo kluubas: hyö ommeltih ruutat omile lapsile.

Kluuban jälgimäine pruazniekkuvastavus piettih 27. sulakuudu.  Pahakse mielekse ei kai lapset da vahnembat voidu tulla sinäpiän täh pidoh: erähät jo lähtiettih huogavumah ken lämmäle muale, ken duačale. Ga net, ket tuldih pruazniekale, suadih hyviä mieldy. Enzimäi kaikin pastettih šipainiekua. Master-kluasan pidi Nina Jegorvna Jakovleva Uvves Vilgaspäi. Lapset mielihyväl iče ajeltih kuorii, pandih syväindy da yhtistettih piirualoi. Kuni piiruat pastuttih, lapset ozutettih vahnembile pieni ezitys: pajatettih da soitettih soittimii. Mibo lapsien pruazniekku lahjoittah? Joga lapsi sai lahjakse oman fotokuvan da omin käzin luajitettavu ramkaine.

– Tahtozimmo, ku projektu suas jatkua tuliengi vuvven, sanou KRL:n piälikkö, – sih näh pidäs löydiä se ristikanzu, kudai rubieu järjestämäh moizii vastavuksii...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat