Vienan Karjala

Kirjutukset vienankarjalakse

Vladimir Putin: ”Karjalaiset kalitat ollah hyvin makiet”

Venäjän presidentti Vladimir Putin.

Karjalan hallitukšešša Valtijon piämieš tapasi Venäjän Federalisen Kokoukšen rinnalla toimijan Lakijen luatijien neuvošton jäšenien kera. Tapuamiseh ošallissuttih Lakijen luatijien neuvošton toiset piämiehet – Federalisen Kokoukšen piämieš Valentina Matvijenko ta Venäjän Valtijollisen Duuman piämieš Sergei Nariškin, šekä yli 70 alovehellisien parlamenttien johtajua.
Lakijen luatijien neuvošto, Venäjän Federalisen Kokoukšen rinnalla toimija neuvottelu ta konsultativini elin, on peruššettu vuuvven 2012 oraškuušša. Šiih kuulutah federalisen ta alovehellisien parlamenttien johtokunnat.
Tapuamisešša Vladimir Putin kerto, jotta Lakijen luatijien neuvošton peruštamisen piätarkotukšena on alovehien lakijenluajinta-alottehien luavun ta effektiivisyyvven nošto.
Vladimir Putinin šanojen mukah, Lakijen luatijien neuvošto voit vaikuttua alovehellisien interessien eistämiseh.
Valtijon piämieš erikseh huomautti, jotta enšimmäistä kertua tapuamini Lakijen luatijien neuvošton jäšenien kera on järješšetty Moskovan ulkopuolella. Presidentin šanojen mukah še on hyvä tapa, šentäh kun joka alovehella on ominaisuukšie, ka šamoin kaikilla alovehilla on yhtehisie piirteitäki. Šemmoni praktikka antau mahollisuuvven lähistyä Lakijen luatijien neuvošton jäšenien tapuamisie ihmisih ta realisih propleemoih.
Venäjän presidentin tapuamisešša Lakijen luatijien neuvošton jäšenien kera pakina koški alovehilla aktualisie teemoja.
Pohjois-Osetijan parlamentin piämieš Aleksei Mačnev kerto väještön työššä olon propleemašta. Yhtenä varianttiloista, mitein ratkaissa še propleema, voit olla ravitsemušalan palvelujen avuamini kanšallisen kuhn’an pohjalla. Šemmoni ideja šynty, konša Aleksei Mačnev kyšy presidentilta, maisteliko hiän osetijan piiraita, kumpaset ollah McDonald’sin vahvana kilpailijana.
Vladimir Putin šano, jotta maisteli ta korošti, jotta Venäjällä on oikein makie ta eriluatuni kuhn’a. Hyvän kanšallisen kuhn’an esimerkiksi hiän mainičči čak-čak, tataarien bel’ašija ta karjalaisie kalittoja.
Valtijon piämiehen šanojen mukah, ravitsemušalan palvelujen kehittämini kanšallisen kuhn’an pohjalla on hyvä ideja.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat