Vienan Karjala

Kirjutukset vienankarjalakse

”Piäššä miut šuruista”

Šulakuušša Kalevalašša kävi Koštamukšen ta Kemin piispa Ignati. Hiän kävi kaččomah tulovan kirikön šalvošta ta anto šiunaukšeh työn jatkamiseh.

Ajatuš časoun’an rakentamisešta pos’olkan kalmismuan alovehella šynty jo aikoja takaperin, kuitenki vašta viime kešänä tätä ajatušta ruvettih toteuttamah.

Koštamukšen ta Kemin piispa Ignati anto šiunaukšeh hautaušmuan časoun’an rakentamiseh. Uuši časoun’a rakennetah Jumalanmuamon Haihuta miun šurut -ikonin kunnivokši. Šemmosie Jumalanmuamon kunnivokši nimitettyjä molintapaikkoja aina on rakennettu hautaušmailla.

Viime kešänä tulovan časoun’an paikalla piettih rukoušpalveluš, kumpasen jälkeh rakennuštyöt oli alotettu. Šeurakuntalaisien voimilla oli valmissettu rakentamispaikka: meččä oli hakattu, aloveh puhaššettu ta valattu tulovan časoun’an jalušta. Kalevalan Pietarin ta Puavilan kirikön papin, Isä Jevgeni šanojen mukah časoun’an šalvoš noušou Jumalan avulla kattoki ašetetah jo tänä kešänä.

Meččä rakentamista varoin oli varuššettu vielä talvella. Časoun’an šalvokšeh käytetäh vain talvella hakattuo mäntymeččyä, kumpani on keštävämpyä ta korkieluatusempua puuta. Oli vaikie löytyä ihmisie časoun’an katon rakentamiseh. Nelilapekatto šuuren kupolin kera on ylen monimutkani rakenneh. Kuitenki nyt tuo propleema on ratkaistu.

Šulakuušša Kalevalašša kävi Koštamukšen ta Kemin piispa Ignati. Hiän kävi kaččomah tulovan kirikön šalvošta ta anto šiunaukšeh työn jatkamiseh.

Ieššä on vielä äijän työtä, kuitenki koko mierulla ne kaikki työt šuahah lopettua.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat