Vienan Karjala

Kirjutukset vienankarjalakse

Iivan Rokačču – karjalaine partizuanu

Tarinoin mugah Rokačču oli ravei, kumman vägevy da mielevy mies.

Kahten suuren muan – Ven’an da Ruočin – välis pieni Karjal ainos oli verizenny kohtannu, kus vastakkai tuldih käzin toine toizeh, poltettih da tapettih, juattih mualoi, opittih muanittua toizeh uskoh.

Nämmis aijois on kulunuh sadoi vuozii, ga vie tässäh mustos ollah heijän nimet – Ahma, Vuorna, Kirill Rogozin, Luka Räsänen, Mikitka, Robonitsa, Odina Savanov, Tretjak Kolosnik, Ivan Rokačču.

Tänäpäi rodieu kerrottu Rokačus.

Ivanko Stepanov Rogač

Tiikšin kyliä, kuduaspäi rodužin oli Rokačču, mainitah enzimästy kerdua XVI vuozisual. Lapin pogostoin vardoičuskirjois on olemas kylien da niilöin eläjien luvettelo: ”Tiikšin kylä, sie eläy muanruadajua: Ivanko Stepanov Rogač, kylvöy ruistu osminu, heiniä viizi kuhilastu…Ileika Ondrejev, kylvöy ruistu pol-osmini, heiniä 2 kuhilastu... Kaikkiedah Spuasan pogostal Rukajärvel da lähimäzis kylis on 44 pihua, rahvastu niilöis 70 hengie.”

Moizii luvetteloloi luajittih XVI vuozisual muanruadajii muale kiinnittämizekse, ku tietois olis äijygo taloidu, pihua, eläjiä on kylis, äijygo veruo ottua heis valdivoh.

Tämä dokumentu on arvokas sit puoles, ku tiä on mainittu Suuren Tiikšin kylän eläi Ivan Rokačču (Rogač). Se on tottutoven elänyh ristikanzu. Kylien eläjis häi on mainittu enzimäzenny, häi ainavo on merkitty luvetteloh ižännimel. Nägyy, ku sidä ristikanzua kunnivoittih kyläläzet.

Repol’an da Rukajärven pogostat (nygöine Mujehjärven piiri) XVI vuozisuas algajen kuluttih Lapin pogostoih, Novgorodan mualoih.

Vuvvennu 1478 nämmä muat Novgorodan peräh ruvettih kuulumah Ven’an keskivaldivoh – Moskovale.  XVII vuozisuan toizel puoliškol Repol’an da Rukajärven pogostat ollah Anuksen piän al da Anuksen ujezdan käskynhaldivoiččijan vallan al.

 

Eliä omal vallal

Vuvvennu 1611 kevätkuun aigah ruoččilazet, kudamii johti Andreas St’uart, ruvettih eistymäh Repol’ahpäi, ku tahtottih valloittua Vienan meren Sumskii ostrog. Ruoččilazet valloitettih suuren alovehen: Lentiera, Tuuseni, Luovutsuari, Repol’a, Kolvasjärvi, Roukkula, Čolku, Kiimaisjärvi. ”…Kylät poltettih, rahvahii muokattih, erähii otettih kiini”.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat