Vienan Karjala

Kirjutukset vienankarjalakse

Šuuret pivot Lietmašša

Konserttiohjlemah ošallissuttih laulu- ta tanššiyhtyvehet Petroskoista, Lietmašta, Koštomukšešta, Rukajärještä, Uuvvešta Vilgašta ta Volomašta.

Šentäh Kanšallisien kulttuurien kekšukšen toimittajat piätettih juhlie šamah aikah Lietman šyntymäpäivän kera kanšallisen ruuvvan pruasniekkua. Tätä ajatušta kannatettih Kulttuuriministerijö, Kanšallisuušpolitiikan ministerijö, Mujejärven piirin ta pos’olkat hallinnot. Pruasniekka, kumpasen nimekši oli kekšitty ”Šuuret pivot Lietmašša”, järješšettih paikallisešša kulttuurikeškukšešša.

Pruasniekan alušša oli Lietman ta Segežan koululaisjoukkojen jalkapallopeli, šiih ošallissuttih aikuhisetki.

Piätapahtuma oli järješšetty kulttuurikeškukšen kentällä. Pahašta šiäštä huolimatta pruasniekkah keräyty äijä rahvašta. Tullehet šuatih maissella venäläistä, karjalaista, valkovenäläistä, ukrainalaista, kaukasilaista ta uzbekilaista perintehellistä ruokua. Lapšilla oli tarjolla erilaisie pelijä huvilaittehie.

Pruasniekan järještäjien tervehyššanojen jälkeh alko tanšši- ta lauluryhmien konsertti. Ošallistujie oli tullun Petroskoista, Lietmašta, Koštomukšešta, Rukajärještä, Uuvvešta Vilgašta ta Volomašta.

Petroskoista tultih jevreijen Aviv-tanšširyhmä, Rahvahallini kuoro ”Ukrainalaini laulu” ta Unelma-perehansambli. KRL:n johtaja Natalja Vorobei esitti järještön symboliikkua ta muistoesinehie.

Jälešti nurmikolla KRL:n jäšenet järješšettih Kyykkä-pelin muasteri-oppie, kumpasen jälkeh piettih pari kokeilupelie.  

Pruasniekan lopušša palkittih parahie ošallistujie, urheilijie ta keittäjie. Järještäjien mieleštä julha onnistu. Nyt šitä šuunnitellah pruasnuija Karjalan Tašavallan toisissaki piirilöissä.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat