Vienan Karjala

Kirjutukset vienankarjalakse

Enzimäzes suomelas-ugrilazen muailman kul’tuurupiälinnas

Starije Bigi -kylä on ylen čomal kohtua, kyläs da sit ymbäri kai on kunnos da puhtas // Kuva: Jelena Filippova

Mulloi MAFUN:an kehitykseshäi ruvettih pidämäh kilbua, kudamas vallitah suomelas-ugrilazen muailman kul’tuurupiälinnu, sendäh istundon piendykohtu ei olluh vallittu petties. Starije Bigi on piässyh vagavas kilvas läbi da rodih enzimäzekse Suomelas-ugrilazen muailman kul’tuurupiälinnakse. Kilvan loppuozas se jätti jällele meigäläzen Veškelyksen da eestiläzen Obinitsan. Ylen äijäl himoitti kaččuo, mibo kylii on Starije Bigi. Dai kävves en pettynyh ni yhty, kyläle oli mindäh andua moine korgei arvonimi.

Starije Bigihäi on vahnoi udmurtielazii kylii. Udmurtielaziigi se tottu on. Eläjiä kyläs tänäpäi on 630 hengie. On toinah yksi libo kaksi perehty tulolastu, hyö vai ei malteta udmurtien kieleh. Dostalit kaikin ollah udmurtielazet da paistah omah kieleh. Paistah tottu kaikin: vahnembua polvie rahvas, nuorižo da lapset. Onnuako mostu en nähnyh vie ni yhtes suomelas-ugrilazes kyläs da linnas Ven’al.

Igiä kyläl on enämbi nelliäsadua vuottu. Enzimäzet eläjät tuldih nämmile mualoile Vužgurt-kyläspäi. Sit kyläs, sanotah, oli vai yksi silmykaivoine da naizile, kudamat tuldih viele, pidi hätki seizuo vuottamas, kuni suajah rengit täyttiä. Sendäh rahvas lähtiettih kyläspäi iäre toizih vie eloittamattomih kohtih. Löyttih korbimečäs čoma kohtu, kus silmykaivuo oli äijy da jiädih sinne elämäh. Sil kohtua, sanotah, kazvoi pitkähkö da ylen pehmei sammal – big-big žui. Se andoigi nimen kyläle...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat