Vienan Karjala

Kirjutukset vienankarjalakse

Värttinä Vienašša

Viime pyhänäpiänä, 29. kešäkuuta muajilmantunnettu Värttinä-yhtyveh piti ainuon konserttiesitykšen Haikol’an kyläššä. Vuotena 1983 peruššettu Värttinä on tullun hyvin tunnetukši ympäri muajilmua. Värttinän peruštajina oltih čikokšet Mari ta Sari Kaasiset. Alušta yhtyveh oli šuuri, šiih kuulu 21 henkie. Yhtyveh esitti enimpäisen karjalaisie kanšanlauluja nykyaikasešša šovitukšešša, ka ajan mittah heijän ohjelmisto leveni, karjalaisen musiikin lisäkši artistat ruvettih esittämäh marilaista, virolaista, inkeroista ta saamelaista musiikkie. Nykyjäh yhtyveheššä lauletah Mari Kaasinen, Susan Aho ta Karolina Kantelinen. Marilla ta Karolinalla on karjalaisie juurija. Kaikin ollah ammatilliset kanšanmusiikin tietäjät. Naiset iče kirjutetah tekstijä ta musiikkie Värttinyä varoin. Värttinän ošallistujat on käyty esiintymäššä Puolašša, Irlannissa, Amerikašša, Kanadašša, Japanissa. Viime vuotena yhtyveh oli esiintyn Petroskoin Laulujuhlissa ta tänä kešänä enšimmäistä kertua tuli Vienan Karjalah. Ennein konserttie yhtyvehen ošallistujilla oli järješšetty tapuamisie Kalevalan piirin luomiskollektiivien kera. Vuokkiniemeššä artistat tavattih Kataja-ryhmän ta Kalevalašša kerrottih omašta luomistyöštä Uhut-šeuran jäšenillä. Värttinän konsertti taivašalla Haikol’an avarilla maisemilla kuulošti erinomaiselta ta toi äijän hyvyä mieltä kaččojilla.
Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat