Vienan Karjala

Kirjutukset vienankarjalakse

“Minä pagizen karjalakse”

// Kuva: Margarita Kempainen

Tänävuon oli Suomen vuoro ottua vastah livvin opastujii. Mulloi kursiloi piettih Karjalas Kotkatjärves. Tänävuon Nurmeksen linnas, kudai on Suomen Pohjas-Karjalas, Hyvärilän matkailu- da nuorižokeskukses nedälin aigua kuuluu karjalankielisty paginua. Kursiloin opastajat oldih endizet: Ol’ga Žarinova da Nadežda Mičurova (Bukina). A opastujien joukos oli uuttu rahvastu. Ei kai, ket oldih mennyzinny vuozinnu kursiloil, voidu tulla täl kerdua.

Kursit algavuttih yhtehizes vastavukses, kudamal jogahine saneli omas ičes da sit, midä kuuluu hänele. Sit opastujat juattih kahteh joukkoh, enzimäzes oldih net, ket allettih kielenopastustu, toizes – ket jatkettih sidä. “Jagua” pidi karjalaine Maria Kahärin perehgi. Maria tuli kursiloile kahten lapsenke. Juulil, vahnimal tyttärel, on kuuzi vuottu igiä. Häi lähti karjalan kielen algukursale. Iče Maria pienen Iivo-poijanke opastui sit joukos, kus jatketah kielenopastustu.

Opastujat vagavasti tartuttih ruadoh, äijäthäi heis iče ollah ven’an, karjalan da anglien kielen opastajat omis kylis. Kursiloil karjalan kielioppii jatko-opastujat kačottih jo äijän kerdua, sendäh tänävuon enämbän huomivuo tahtottih kiinnittiä paginkieleh. Opastundan aigah kursilazet ehtittih sanella toine toizes, luajittih ičelleh portfoliot, niilöin mugah opittih suaja omah puoleh ruavonandajat. Tämän ližäkse opastujat käydih kuulužah karjalazeh Bomba-taloih da Murtovaara-muzeih.

Tämä vuozi Ven’al on sanottu kul’tuuran vuvvekse, sendäh ei petties kursiloin nimes sežo kuului kul’tuuru-sana. Tämän hantuzis opastujat piettih paginua da luajittih prezentatsiet. Ol’ga Žarinova, kudai jo nelli vuottu ruadau Karjalan Kanzallizen arhiivan johtajannu, seneli Perehen arhiivu -kilvas, kudamah työttih sežo ruaduo karjalan kielel. Alisa Gubareva da Ol’ga Ogneva ollah yhtytty sih.

Marina Ustinova, kudai enzi kerdua tuli kursiloile, on Kantele-ansamblin “Ainon” ohjuajannu. Häi saneli ansamblin histouries, sen alguhpanijois da ruavos karjalazen pajon säilyttämizekse. Kuundelimmo artistoin eri vuozien pajatandua karjalan kielel.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat