Vienan Karjala

Kirjutukset vienankarjalakse

Sommelon iänijä Vienan Karjalašša

Iltakatrillin aikana kaikkie halukkahie opaššettih tanššimah karjalaisie ta šuomelaisie tanššija. // Kuva: Janne Seppänen

Perintehen mukah heinäkuun alušša Šuomen Kuhmošša alkanut festivaali šiirty Vienan Karjalah. Konšerttiohjelmie piettih 5.–6. heinäkuuta Kalevalašša, Kepalla, Kuušiniemeššä ta Haikol’ašša.

Festivaalin enšimmäisenä päivänä Kalevalan Kulttuuritalošša piettih šuuri gala-konsertti, kumpaseh ošallistu monta luomiskollektiivie. Tänä vuotena Sommeloh tuli Ivuški-folklooriryhmä Veškelykšeštä, naisien Kataja-vokaaliryhmä Vuokkiniemeštä, kalevalalaini Tarina-yhtyveh. Šuomen puolelta festivaalin ohjelmua korissettih Taito Hoffrenin ta Maari Kalbergin runot ta rahvahan laulut, šekä Tuomas Rounakarin šoitto šamaaniviululla.

Šaman päivän illalla kaikki halukkahat šuatih ošallistuo Iltakatrillih. Festivaalin järještäjät esitettih mukavan muasteri-opin, kumpasešša opaššettih tanššimah karjalaisie ta šuomelaisie rahvahan tanššija.

Sommelon toini päivä alko Kuittijärven rannalla Jamasen aitan luona. Tarinan mukah vuotena 1836 šiinä paikašša pietty Elias Lönnrot, konša matkušti Vienan Karjalan kylijä pitin.

Šiitä musiikin, laulun ta tanššin pruasniekka šiirty Haikol’an kyläh. Šoiva kylä -musiikkiohjelma tuli Sommelo-festivaalin keškikohakši ta myöhäseh iltah šuaten ilahutti kuin kaččojie, niin ni artistoja.

Tänä vuotena Sommelo-festivaali oli pietty jo yhekšättä kertua.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat