Vepšän muan Elonpu

Elonpu (Elämän puu) on vepšäläisien vanha simvoli, kumpani merkiččöy männyön, nyky- ta tulovan ajan yhteyttä. Šamalla Elonpu on vepšäläisen kulttuurin pruasniekka, kumpani ilmešty Šoutjärveššä 27 vuotta takaperin. Juhlan tarkotukšena on šäilyttyä Karjalan kantarahvahan perintehie ta kieltä.

Elonpu-pruasniekan alkuhpanijana oli paikallini opaštaja, folkloristi, Vepšäläisen etnografisen musejon johtaja R’urik Lonin. Vuuvvešta 1989 pruasniekkua ruvettih viettämäh Leningradin ta Vologdan alovehilla. Ka vuotena 2012 Elonpu-pruasniekka elävytettih ni Karjalan vepšäläisien elinpaikašša, mistä še šaiki oman alun.

Tänä vuotena Šoutjärvi otti vaštah vierahie kahen päivän aikana. Vepšäläini piirileikki -projektin puittehissa kyläššä järješšettih perintehellisen pruasniekan lisäkši ni tietoseminaari folkloristija varoin.

Heinäkuun 12. päivänä šoutjärveläisien lempi lepopaikašša, kaunehešša männiköššä Iänisjärvellä vietettih Elonpu-juhlua. Joka vieraš šai lahjakši värikkähän lentan, kumpasen šiitä piti šituo onnekši Elämän puun simvolin okših. Šuurella nurmikolla oli järješšetty juhlakonsertti, a jarmankalla šai oštua paikallisien käsityömuasterien suveniirija ta vepšäläistä sriäpnyä.

Pruasniekan ohjelmašša oli Petrunpäivä-teatterinäytelmä, luomiskollektiivien esitykšet, muasteri-opit.

Interaktiivisellä Vändäm uhtes (Leikimmä yheššä) -kentällä lapšie varoin oli pietty leikkiohjelma.