Vienan Karjala

Kirjutukset vienankarjalakse

Haikol’an kylän kotikunnan tarina

Kaikin keräyvyttih kylän konserttišalissa, jotta muissella kirjailijua, paissa hänen elämäštä ta kuulla elävyä karjalaista pakinua // Kuva: Nadežda Vasiljeva

Terveh, šukulaiset! Šemmosilla šanoilla tervehittih toini toisie kaikki, ket tultih 13. heinäkuuta Kalevalan piirin Haikol’an kylän kirjallisuušfestivaalih. Festivaali oli järješšetty Ort’t’o Stepanovin šiätijön ta Kalevalan piirihallinnon tuvella.

Viijentehtoista kertah festivaalih tultih meijän muanmiehen Ort’t’o Stepanovin luomistyön harraštajat ta kunnivoittajat. Viijentehtoista kertah rahvahan kirjailijan kotimualla vietettih jokavuotini Rodiči-kirjallisuušfestivaali.

Perintehen mukah Ort’t’o Stepanovin hauvalla oli lašettu kukkie. Šiitä kaikin keräyvyttih kylän konšerttišalissa, jotta muissella kirjailijua ta paissa hänen elämäštä, kaččuo dokumenttifilmija ta kuulla elävyä karjalaista pakinua.

Tänä vuotena omien konserttiohjelmien kera pruasniekkah tuli venäläisen laulun Pitarici-kuoro Petroskoista ta rahvahan laulun Kalevala-yhtyveh.

Rodiči-festivaalin ošallistujat muisseltih omista tapuamisista kirjailijan kera ta kirjallisuušfestivaalin peruštamisešta. Kantaeläjät kerrottih loittosešta ta šisällökkähäštä Haikol’an kylän elämäštä. Hyö tunnettih iččie ta omie kantatuattoja Ort’t’o Stepanovin Kotikunnan tarina (venyähekši Rodiči) -trilogijan šankariloissa. Monet tiijetäh, jotta romaanin ideja šynty kirjailijalla juuri Haikol’ašša, kantatuattojen talošša, missä kaikki muissutti muinaisaikoja. Šentäh ni kirjallisuušfestivaalilla oli annettu Rodiči-nimi.

Rodiči-festivaalissa pitälti kuulu karjalaisie rahvahan lauluja. Tuntu šiltä, jotta kirjallisuušfestivaali vuosi vuuvvelta tulou aina kuulusammakti ta joka vuosi šiih keräytyy aina enemmän uušie yštävie.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat