Vienan Karjala

Kirjutukset vienankarjalakse

Ennevahnallizeh svud’bah näh

Ennevahnas svuad’boi piettih da kižattih kai kolmin päivin, eigo enämbiägi.

Meijän polvel niidy eigo sua mustua, eigo tiediä. Min kuulimmo vai buabolois da died’olois. Hierulois svuad’bua kaččomah käydih kaikel hierul. Pertit hot oldih suuret, ga muga liččavui sinne rahvastu, ga čut ei viertä stolas istujien piäle, istuo pidäy stolan tagan gryhnäkkäzelleh.

Tuldihgo lapset, ket voidih piästä pihal. Andilahan da ženihän ristižät, kudamas puoles menöy svuad’bu, lapsile  juattih gostinčua: oriehua, n’amuu, iz’umua da muudu magiedu. Nuorižo tuldih pläšindöin da kižoin täh, a vahnembil pidi nähtä, midä oli stolil syömisty da pastostu. Da vie oli mugagi, gu hierun rahvastu gostitettih, konzu nuorižo stolaspäi lähtiettih saruale pläšindöih.

Kodvan jälles svuad’bua hierun akat käveltih toine toizelluo mustelemah da suudimah svud’bua. Svuad’boi muga kačottih, ga toiči unohtuttih kodižiivatat, jiädih kaččomattah.

Ennevahnas hierun lapset käveltih štanoittah. Tyttözil oldih pitkät helmat, kandusuonissah, a brihaččuloil oldih pitkät paijat, polvessah daigi alle polven. Brihoile štanat ommeltih, konzu tuli aigu lähtie kožiččemah andilastu. Mustettih meijän buaboit, ku tulou poigu tuatalluo da sanou:

‒ Tuatto, minuu naituttau.

‒ Kuibo naituttau? kyzyy tuatto.

‒ Naituttau, gu syötättäy.

‒ Nu sit voit vie brihastua, vastai tuattah.

Menöy minto aigua, tulou myös poigu tuatalluo dai myös sanou:

‒ Tuatto, minuu naituttau.

‒ Kuibo naituttau? kyzyy tuatto.

‒ Naituttau, kui ulgoh käytyttäy.

‒ Nu, voit sit vie brihastua, sanou tuatto.

Menöy vie aigua, tulou uvvessah poigu tuatalluo da sanou:

‒ Tuatto, minuu naituttau.

‒ Kuibo naituttau? kyzyy tuatto.

‒ Naituttau, kui kuzettau.

‒ Ohoh, sanou tuatto, ‒ sit vuottua ei sua. Ongo sinul tyttö, kudamas himoittau naija?

‒ On, sanou poigu.

‒ Sanos sit, kenbo se on moine ozavu, kuduah sinun silmy iških? kyzyy tuatto.

‒ Ga neče, Man’n’u, sanou poigu.

‒ Midäbo hyvytty lövvit sinä nečis Man’n’us? kyzyy tuatto.

‒ Ga Miikul sanoi, hänel on suuret nännit da pehmei perze.

‒ Nu, ku Miikul muga sanou, ga ottakkah Miikul iče sen Man’n’un... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat