Vienan Karjala

Kirjutukset vienankarjalakse

Ket työ oletta, pomorit?

Belomorskin etnokeškukšen johtaja Ol’ga Stepanova, opaštaja Nadežda Sem’onova, kumpani pitäy lapšilla käsityön oppituntija ta paikallini pomorilaini mieš. // Kuva: Alina Čuburova

Eryähät tutkijat ta kanšalaisaktivistit ollah šitä mieltä, jotta pomorit on erillini kanša oman kulttuurin ta kielen kera. Ka toiset istorikot šanotah, jotta pomorit ollah venäläiset tai venäläisien «subetnos» kumpani tuli elämäh Vienanmeren rannikolla. Šamoin kuin Onegajärven takuana eläjie kučutah «zaonežaniloiksi». Karjalan pomorit tultih Novgorodin alovehelta.

Belomorskin, Kemin ta Louhen alovehella eletäh kakši kulttuurie – karjalaini ta pomorilaini.

N’uhča on vanha pomorilaini kylä, kumpani šijaiččou šamannimisen joven rannalla. Paikannimi tuli saamenkieliseštä n’uhč-šanašta, kumpani tarkottau ”joučenta”, niin jotta N’uhča on ”jouččenen joki”.

Kahen kilometrin piäštä jovella tulou Vienanmeri, taikka Valgiemeri kuin kučutah šitä Tunguon karjalaiset. Ihmehellistä on, jotta N’uhča-joki jakautuu košella kahteh puoleh. Šiinä puolešša, kumpani juokšou kyläššä, vesi ei ole šuolani, ka še puoli, kumpani tulou mereštä tietyšti on šuolani. Jovella on äijän valkošinistä šavie, šanotah, jotta še on liäkehšavie. Tätä šavie paikalliset šanotah ”n’aša”.

Koulušša ruatau opaštaja Nadežda Sem’onova, kumpani pitäy lapšilla käsityön oppituntija, nykyjäh šitä šanotah tehnologijan oppitunniksi.

Nadežda Sergejevna jo monie vuosija tutuššuttau lapšie pomorilaiseh kulttuurih. Yheššä hyö järješšetäh tutkimušmatkoja pomorilaisella alovehella. Matkojen tulokšekši tullah tutkimuštyöt, kumpasie lapšet esitetäh erilaisissa piirin ta tašavallan tilaisuukšissa ta konferenššiloissa, joškuš käyväh esiintymäššä äšen Moskovah. N’uhčan lapšet useičči šuahah parahie arvošanoja ta enšimmäisie paikkoja kilpailuissa.

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat