Vienan Karjala

Kirjutukset vienankarjalakse

Sohjanankošen kalaštajat

1. Kylpömiseštä vesiammehešša tuli jo hyvä perinneh. Nuorie ei pie kovin pitälti šuoššutella, hyö ilomielin törpiköijäh veješšä. // Kuva: Kuva otettu Vienan Karjala -lehen arhiivašta.

Joka vuosi heinäkuun toisena pyhäpäivänä Kalaštajien pruasniekan uattona Sohjanankošella juhlitah kylän päivyä. Šinä päivänä merkitäh Kalaštajien päivyä, vet ennein kyläššä toimi kalatehaš ta i kaikki miehethän Karjalašša ollah kalaštajie.

Juhlah keräyty äijän vierahie, niin kuin ni ainaški. Heitä tuli Kiestinkistä, Piäjärveštä, Louhešta ta äšen Čeboksarista.

Tavan mukah pruasniekan vetäjät, kulttuuritalon ruatajat Natalja Borodkina ta Nina Grigorjeva onniteltih Käsimuasterijen- ta Paraš piha -kilpailujen voittajie. Šamoin onniteltih kylän vanhempie eläjie: Iskakovien pariskuntua, Zoja Antonovua, Tolstik Helmie, Tatjana Sal’nikovua, Vera Langujevua, Andrijenko Pelagejua ta nuorinta kyläläistä – Ligotski Kost’ua. A Volkovien pariskuntua onniteltih heijän perehen merkkipäivällä. Kylän muasterit Aleksanteri P’attojev ta L’udmila Rodionova, šekä paraš kalamieš Aleksanteri Jefimov šuatih lahjoja.

Tänä vuotena Sohjanankošen kylämusejo täytti kymmenen vuotta. Musejošša šäilyy yli 300 eksponattie, kaikki ne oli kerätty kylän eläjiltä.

Kalamiehien päivän pruasniekan ohjelmašša oli lapšien esitykšie, kuulu venäläisie ta karjalaisie lauluja, iče Neptuni onnitteli vierahie pruasniekalla, oli järješšetty perintehellini kylpömini vesiammehešša, šekä kalaruokien ta käsitöijen jarmankoja, oli riittäväšti tanššija ta kalakeittuo.

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat