Vienan Karjala

Kirjutukset vienankarjalakse

Oletgo oigieh kirjutannuh? Tarkista se!

Yhtysvallois roinnuhes Jack Rueter jo hätken aigua eläy da ruadau Suomes. Suomelas-ugrilazen kielet on hänen ruadolala. // Kuva: Jelena Filippova

Joga suurel dai toiči pienel kielelgi, ku ruvetanneh vai kirjuttamah tekstua tiedokonehes, on oma oigiehkirjutustu kačottavu programmu. Ollet ku mingi sanan petties pahoi kirjutannuh libo et pannuh oigiedu välimerkii, programmu andau sinule tiediä sit. Ruskiel viivuau kai hairahtukset da vie nevvou, kui olis parembi sanuo sidä libo tädä. Ven’an kieles vihjuan joga toizel tiedokonehes on tämä programmu. Karjalan kieles tässäh sidä ei olluh olemas. Nygöi on. Sen luajittih suomelazet tiedomiehet Jack Rueter da Timo Rantakaulio.

Kai lähti sanakirjas, kudai Jack Rueter da Timo Rantakaulio luajittih intenettah. Sit sanakirjas hedi suau kiändiä sanoi suomen kielespäi livvikse da vastukarai – livvispäi suomekse. Sanakirju löydyy internetas da sit on 20 tuhattu sanua. Sidä on helpo käyttiä da nevvozin käyttämähgi, silloi konzu  kerras ei juohtu mieleh yhten libo toizen kielen oigei sana. Tämän ližäkse on luajittu toinegi kiännösvariantu: konzu luvet tekstua livvikse libo suomekse tiedokonehes da et ellendä kudamuagi sanua, voit painaldua sih kaksi kerdua da suat kiännöksen.

Ruado libui da nämmien sanakirjoin pohjale tiedomiehet luajittih jo karjalan kielen livvin murdehen oigiehkirjutustu kačottavu programmu. Muga sanottuh kielen tarkistajah, kaččojah pidi kirjuttua kaikkien sanoin taivutus. 

Täs käytettih hyväkse livvin sanakirjoi: Kotuksen luajittuu karjalan kielen verkosanakirjua, Raija Pyölin da L’udmila Markianovan sanakirjua, Martti Penttozen sanakirjuagi.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat