Vienan Karjala

Kirjutukset vienankarjalakse

Hos pieni, ga pippurinjyväine

Karjalazien joukos tänävuon on viizi hengie. Kai opastujat väitetäh, ku kielen opastundu ylen äijäl miellyttäy heidy. // Kuva: Jelena Filippova

Kezän aigua yhty tottu sai lugie joukkoviestimis dai kuulta suuris herrois, ku tänävuon Petroskoin valdivonyliopistoh ei tulluh ni yhty hengie opastumah karjalan da vepsän kieldy. Yliopiston saitalhäi on kai tiijot abiturientois, sanottu on, ken on andanuh da kudamale spetsialnostile dokumentat. Piäzendykilvan mendyy sil samazel saital on ilmoitettu sežo kedä on otettu opastujakse, kedä ei. Kai nygöi suau kaččuo internetas da tiijustua, ga vikse ei kehtattu.

Opastumah karjalan da vepsän kieldy tänävuon Petroskoin valdivonyliopistoh itämerensuomelazien kielien laitoksele tuli seiččie hengie. Toinah sanotto - ei äijiä ole, ga ei ni ylen vähä olis. Kaksi hengie heis rubieu opastumah vepsän kieldy, viizi karjalan kieldy. Yliopistos on karjalan kielen mollemban murdehen opastustu: vienan da livvin. Tänävuon liygiläzien joukko rodieu vähästy suurembi, sit rubieu opastumah nelli hengie. Vienalazii on vai yksi.

Ga ei moizel pienel joukol ruveta opastumah nuoret. Mennyt opastusvuon yliopistoh on otettu anglien da karjalan kielen opastujua. Otettih enzi kerdua da eigo tänävuon, eigo tulieloinnu vuozinnu ruveta ottamah. Opastumah tuli kymmene hengie. Kaikil heil opastundan jälles tulou lähtie ruadamah omih kylih, ruadokohtu heil jo on, juuri sitpäi heidy oli työttygi opastumah. Nämmil nuoril anglien kieli on enzimäine kieli, kudamua hyö opastutah. Karjalan kieli on toine, sidä ruvetah opastumah vaiku toizel vuozikursal, sendäh itämerensuomelazien kielien laitoksen johtajan Tatjana Paškovan sanoin mugah mielevy piätös oli yhtistiä enzimäine kursu da nämä opastujat. Semmite mollembien opastusprogrammois kielen opastukseh niškoi on annettu sama lugu urokkua.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat