Vienan Karjala

Kirjutukset vienankarjalakse

“Kus on kuldazii kukkizii, sie on kaunehii kanazii”

// Kuva: Jelena Filippova

Tänäpäi äijät on ruvettu pidämäh libo tahtottas pidiä svuad’bu karjalazeh tabah. Äijät folklourukollektiivatgi ruvettih elävyttämäh da ozuttamah vahnua karjalastu svuad’buperindyö. Pruazniekoisgi nygöi juohatellah rahvahale, mibo on lembi da kui meijän rahvas sidä nostettih. Kiinnostustu sih on, sendäh Kielen, literatuuran da istourien instituutan tutkijoin uuzi kirju karjalazes svuad’bas rodieu hyvänny nevvojannu rahvahale. Piädykauti sih niškoi se oli luajittugi.

Tiettäväine, tämä ei ole enzimäine kirju kogonah täs teemas. Toine, sanozin. Iče tutkijat, L’udmila Ivanova da Valentina Mironova, sanotah, ku on jo olemas perinpohjaine tutkimus – meigäläzen tutkijan Jurii Surhaskon kirju “Karjalazen svuad’ban piendytavat”, kudai voibi sanuo karjalazen svuad’ban entsiklopediekse.

Uuttu vihjuat kerras, konzu rubiet lugemah kirjua. Kirjan enzimäine puoli on kirjan luadijoin tutkimukset. L’udmila Ivanova tarkah kirjuttau lemmes. Tämä teemu meijän muan rahvahanrunohuos on vähäl tutkittu, sit ei ole äijiä kirjutettu. Sendäh niilöile, ken vähä midä tiedäy lemmen nostandas, rodieu suuri abu kirjutukses.

Lemmen kirjutustu jatkau Valentina Mironovan tutkimus karjalazes svuad’bas – kedä pidi olla svuad’bas, heijän roulis, svuad’ban piendäs iččenäh. Täh tutkii ližiäy svuad’bas pajatettuu: itkuvirty, runuo, liiristy pajuo, častuškua, tuou sananpolvie da sananpiädy, frazeologizmua.

Kirjan toine puoli on svuad’boin stsenaariet. Nämmis stsenaarielois pidäygi olla abuu teatroile, folklourujoukkoloile, nuorile, kudamat šuoritah naimah da miehele menemäh. Nämä stsenaariet ollah tovellizet stsenaariet, kudamii kirjutettih mennyön vuozisuan keskipuolel Karjalas, konzu vie oldih elävät nämä perindöt. Tänäpäigi olis rahvastu, kudamat voijah sanella ennevanhallizes svuad’bas libo lemmen nostandas, ga ei heidy äijiä ole.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat