Vienan Karjala

Kirjutukset vienankarjalakse

Pohjosen piärynöjä

Šemmosie hetelmie lahjotti meilä meijän armaš piärynäpuu. // Kuva: Nadežda Jefimova

Karjalan pohjosešša kaheššakymmeneššä kilometrissä Louhešta on pieni Kieretti-ašema. Šielä on oikein kaunehie paikkoja ta ihana luonto.

Aika kulu ta vanhan šukupolven muutti uuši. Nyt kyläššä talojen ieštä on dačoja. Niin ni miun perehellä omašša kotikyläššä on pieni mua-ala. Šielä myö mieheni Vladimir Pavlovičin kera piemmä kašvimuata, kašvatamma marjoja ta kašviksie iččie varoin.

Kymmenen vuotta takaperin mie olin Petroskoin jarmankalla ta oššin piärynäpuun taimen. En muissa, mimmoista luatuo še oli. Myöjä varmuutti milma, jotta kolmen–nellän vuuvven piäštä piärynäpuu antau hetelmie. Ka aika kulu, a piärynöjä ei ollun.

Viime vuotena meijän piärynäpuu alko kukkie ta lahjotti meilä yhen hetelmän. A tänä vuotena piärynäpuu tuaš alko kukkie ta anto meilä 50 piärynyä. Še on kumma meijän pohjosešša! Kaikki nuapurit käytih ihailomašša meijän piärynäšatuo.

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat