Kanšallini teatteri Kalevalašša

Kalevalan valinta vierailumatan kohtehekši ei ollun šatunnaista. Kannattau mainita, jotta Kalevalan mailla šynnyttih ta kašvettih Kanšallisen teatterin lahjakkahat näyttelijät: Venäjän anšijoitunut näyttelijä ta Karjalan kanšannäyttelijä Vieno Kettunen šekä nuori, kuitenki jo hyvin tunnettu näyttelijä Šanteri Kuikka. 

Kalevalan kaččojat aina ylen lämpimäšti otetah vaštah Kanšallisen teatterin artistoja. Viime vuotena kalevalalaiset šuatih kaččuo Pyhä asie -näytelmän, kumpasešša piärooleissa esiinnyttih näyttelijät Vieno Kettunen ta Pekka Mikšijev.

Uuši Kalevalan vektori -projekti toteutetah Karjalan Kulttuuriministerijön tuvella. Šen piätarkotukšena on nerokkahien nuorien eččimini, kumpaset jatkošša voitais täyventyä Kanšallisen teatterin näyttelijien rivit. Näyttelijän lahjojen lisäkši pietäh tärkienä kielitaituo ta kiinnoššušta kanšalliseh kulttuurih.

Projektin aikana paičči näytelmien esittämistä järješšetäh šamoin Miun teatteri -opaššušohjelma kaikilla halukkahilla.