Vienan Karjala

Kirjutukset vienankarjalakse

Kalevalas, rifmas da muus

Zinaida Dubinina: ”Anna Priäžän festivuali rodies jogavuodizekse, kui piemmö joga vuottu lapsien runofestivualii, kuduan alguhpanijannu on Galina Fedulova” // Kuva: Jelena Filippova

Ei minule kebjieh annetahes nämmä kirjutukset. Minä hätken duumaičin enne, ku rubein kirjuttamah. Minä tiijän, kui äijät ei hyväksytä minun kirjutuksii. No minule ei anneta rauhua minun duumat.

Nenga oli vuvvennu 1991 Anukses karjalazien kerähmös, konzu yksi ristikanzu, kudai ei tiedänyh karjalan kieldy, ga häi oli niidy sillozii ku’tuuran luadijoi, otti sanan da pagizi kerähmön ies. Häi sanoi: “Karjalazil ei ole pajuo”. A minul muga himoitti nosta da sanuo vastah, mi äijy on karjalazil pajuo, vai työ etto tiijä niidy, gu etto tiijä kieldy. No minä olin ylen vaikkani. Ijän kaiken žiälöičen, gu en nossuh, en sanonuh silloi.

A nygöi minä vastuan Georgii Černobrovkinan kirjutukseh: “Karjalazen literatuuran kehitändäs.” En voi hyväksyö sanoi: “Karjalankielizen runohuon pohjannu on ven’ankieline runohus… Ei sua mehanizesti vierastu ottua da juuruttua omah.”

Kebjieh sanottu, vai jygei da abei, kibei on karjalazel lugie. Vai myö, karjalazet, emmo tiedänyh da emmo käyttänyh enne rifmua? Luvekkua hos vahnoi karjalazii sananpolvii, sie lövvättö.

Yksi kerras mieleh tuli: “Suudu viäristä, da omua puolista.”

Rubien puolistamah omua kui voin ga muga.

Minä jo kuulin net sanat suomelazes: “Mikse etto kirjuta “Kalevalan” luaduh?” Da, minä suvaičen “Kalevalua” dai sen sanelenduluaduu, tiijän, ellendän kaiken meijän istourien, luvin äijän ven’an dai suomen kielel. Se pidäy mustua kaikil karjalazil. No se on ammui mennyh aigu, meijän kunnivokas istourii, a elaigu matkuau ielleh.

“Kalevala” on meijän ylbevys.

No tahtottogo työ, gu myö jiännyzimmö sih mennyöh aigah? Gu meidy ei olis täs XXI-vuozisuas? No myö olemmo, elävät da kieli on elos. No, kui kai muailmas, muga muutuimmo myö dai meijän kieli. Vai sanotto: ven’an kieli ei muuttunuh? Muutui sežo, i työ etto kirjuta sil ennevahnallizel kielel. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat