Vienan Karjala

Kirjutukset vienankarjalakse

Karjalazet illačut Tukholmas

Karjalan kielen suvaiččijat Ruočis -yhtistyksen piälikkö Olli Hörkkö sanelou karjalazis da karjalazes kul’tuuras ruočinkielizile gostile. // Kuva: Jukka Painilainen

Karjalan kielen da kul’tuuran ystävät kerryttih kylmykuun lopus Tukholman vahnah linnah, kus Karjalan kielen suvaiččijat Ruočis -yhtistys pidi jo perindökse tulluot Karjalazet illačut. Täl kerdua illačus oli äijy ruoččilastu juurdu olijua rahvastu. Kui mulloigi illačču järjestettih Vieljärven Karjalan kielen koin hyväkse.

Illačun piendypaikakse vallittih yhtistykseh kuulujan, tundietun karjalastu suguu olijan taidogalleristin Marjatta Nenanderin ruadotilat arvokkahas linnan kohtas. Rahvastu illaččuh tahtoi tulla äijiä enämbän, migu gallerein tiloih syndys, sendäh pidi rajoittua tulluzien miäry nellähkymmeneh.

– Äijile pidi sanuo, ku emmo enämbiä rahvastu voi ottua vastah. Sendäh tahton luadie vie yhten moizen pivon kui vai vois teriämbi, sanou Marjatta Nenander.

Gostien joukos täl kerdua oli silmynägeviä enämbi ruoččilastu migu Tukholman karjalastu da suomelastu.

Kandeleh da Karjal kiinnostetah ruoččilazii

Ruočinkielizii gostii nimenomah kiinnosti Ruočin kandeleh- da kalevanystävii edustajan Helena Häggtsömin kandelehel soitandu. Helena soitti kui viizikielisty, mugai suurdu kandelehtu.

– Ruoččilazil ei ole nimittumua viärymieldy kandelehtu kohtah, sanelou Helena. – Ruočin suomelazet sen sijah pietäh sidä vahnanaigazennu soittimennu, kudamal vobi soittua vaiku rahvahanmuuzikkua...

Ruočinkielizet gost’at kyzyttih myös äijän karjalazes kul’tuuras.

– Ruočis enimmäkseh nimidä ei tietä karjalazes kul’tuuras, sendäh šipainiekat, liput da Karjalan bal’zamu oldih heile ihan uuttu. Kyzymysty oli äijy da opimmo vastata niilöih kui vai vois oigieh, sanelou Karjalan kielen suvaiččijat Ruočis -yhtistyksen piälikkö Olli Hörkkö... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat