Vienan Karjala

Kirjutukset vienankarjalakse

”Liitto” oli paraš

Kalevalan Kičut-joukon kyykkärit piäštih toisella šijalla. // Kuva: Nadežda Vasiljeva

Jo toista kertua tämmösie kilpailuja pietäh Kalevalan mailla ta voit varmana šanuo, jotta ne tullah perintehellisiksi. Kiinnoššuš tähä pelih kašvau, šamoin kašvau kilpailun ošallistujien miäräki.
Tänä vuotena jyškyjärviläisien ta kalevalalaisien rinnalla Kalevalan kilpailuih yhyttih kyykkäjoukot Vieljärveštä, Kontupohjašta, Čerepovetsista, Aunukšen ta Mujejärven piirilöistä šekä Šuomen puolelta – Šuomuššalmelta. Kilpailujen avajaisissa piirin ičehallinnon johtajan šijahini Nina Stankevičus toivotti urheilijilla hyvä, mäneššykšellistä pelie.
Kilpailujen ošallistujiksi ilmottautu 18 kyykkäjoukkuo, jokahini niistä oli täynnä intuo ta halusi voittua. Tuanosešša tašavallan kyykkäturnaukšešša, mi piettih Vieljärveššä, kovašša kilpailušša Kalevalan Kičut-joukko ihan kisko voiton Kontupohjan kyykkärien käsistä. Nyt Kontupohjan kyykkämiehet tahottih myöššyttyä ičellä voittajanpalmun. Ka valitettavašti hyö ei onnissuttu. Kilpailutulokšien mukah Kontupohjan karhut piäštih vain nellännellä šijalla.
Enšimmäistä kertua kilpailuih yhyttih kyykkärit Aunukšen ta Mujejärven piiristä. Kilpailijat kerrottih, jotta heilä on vielä vähän pelikokemušta, kuitenki tämä peli kiinnošti heitä. Hyö kuoteltih voimieh Kalevalan kyykkäkentällä ta ollah valmehet kehittämäh tätä pelie omissa piirilöissä.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat