Vienan Karjala

Kirjutukset vienankarjalakse

Uuši urheilukeškuš avasi oveh

Lumi-urheilukeškuš šijoutuu kaupunkin keškukšešša Neglinkajoven varrella. // Kuva: Oleg Geras’uk

Petroskoissa Neglinkajoven varrella avattih pitälti vuotettu Lumi-nimini urheilukeškuš, kumpasen piäarenana on jiähalli. Avajaisien uattona šiinä järješšettih lapšien jiäkiekkoturnauš, kumpaseh ošallistu jiäkkiekkojoukkoja Koštamukšešta, Segežašta, Kalevalašta ta Šuojušta.
Kaupunkihallitukšen urheilun ta nuorisopolitiikan hallinnon johtaja Aleksandr Bakančuk ta Lumen johtaja Olga Zaletskaja järješšettih lehtimiehillä kiertokäynnin ta kerrottih piäšylippujen hinnoista.
– Jiähalli rakennettih liittovaltijon, tašavallan ta kaupunkin yhteisrahotukšella. Šamantyyppisie, ka äijyä tilavampie urheilukeškukšie on rakennettu Sočin talviolimpialaiskisoja varoin. Pituuvveltah ta leveyveltäh jiäkiekkokenttä vaštuau europpalaisie mittoja. Jiän luatu on erinomani. Pintua hoijetah kallehella Zamboni-jiähoitokonehella. Onnekši kaupunki kerkisi hankkie šen ennein rupl’an heikkenömistä šuhtehešša euroh, Aleksanndr Bakančuk myönti.
Petroskoin enšimmäiseššä jiähallissa on ainuo kaččomo, kumpasešša on 411 issuinpaikkua. Lapšien vanhemmat ta muut jiäkiekon kannattajat voijah tulla kaččomah harjotušotteluja ta kaunoluistelujen esitykšie. Alušta še on ilmaista.
Šuurin oša jiähallin aukioloajašta annetah tietenki Petroskoin kuuvvennella lapšien ta nuorien urheilukoululla, kumpasešša harjottelou yhteheš noin 800 alaikähistä. Jiäkiekkoilijat ta luistelijat šuahah harjotella joka päivä päiväkahelta iltašeiččemäh šuate.
Urheilukeškukšešša ei ole toistasekši luissinvuokrapaikkua. Luistimet hankitah myöhemmin ta šamalla järješšetäh niijen terotuš.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat