Uvvenalastu tutkimustu Päivännouzu-Suomen yliopistos

Enzimäzes  projektas ruvetah tutkimah kaunehkirjalližuon kiändämisty karjalan kielele Suomes da Ven’al. Toizen projektan piätavoittehennu on tarita karjalan kielen maltajile nygyaigastu, yliopistoloile pättäviä kiändäjänopastustu. Mollembii projektoi finansiiruijah suomelazet fondat: enzimästy Emil Aaltozen Fondu (Emil Aaltosen Säätiö) da tostu Konehen Fondu (Koneen Säätiö).

Kiändämine da varavonalazen kielen elvyttämine

Syvyskuus 2014 Emil Aaltozen Fondu andoi Päivännouzu-Suomen yliopiston tutkijoile 210 000 jevron suuruzen rahoituksen tutkimusprojektah, kudaman tavoittehennu on tutkie kiändämisty vähembistö- da varavonalazien kielien kontekstas. Finansiiruičendu on nellivuodehine. Projektan yhtenny tutkimusobjektannu on kiändämine karjalan kielen elävyttämizes Ven’al Karjalan Tazavallas da Suomes. Tarkoituksennu on sellittiä kiändämizen käytändehii da merkičysty varavonalazen kielen elvyttämizes. Kyzehes on tutkimuskyzymys, kudamua aijembas kiännöstiijollizes tutkimukses ei ole kačeltu.

Enzimäzes projektas tutkijannu ruadau ezim. filosoufien magistru Riikka Iso-Ahola, kudai tutkiu kaunehkirjalližuon kiändämisty karjalan kielele. Mainitus aihies Iso-Ahola kirjuttau väitöskirjua Päivännouzu-Suomen yliopiston ven’an kielen da kiändämizen ozastol. Tutkimusprojektan johtajannu on germaanien kielen da kul’tuuran abulasprofessoru Leena Kolehmainen...