Vienan Karjala

Kirjutukset vienankarjalakse

Luondo joga kuvas

Kanzallizien kul’tuuroin keskukses samannu piän Nikolai Zaitsev pidi oman Katkattu oza -kniigan prezentatsiengi. // Kuva: Ol'ga Smotrova

Muamankielen päivänny Karjalan rahvahallizien kul'tuuroin keskukses avattih Nikolai Zaitsevan mualavuksien ozuttelu.

Nikolai Zaitsev on Anuksen karjalaine, kazvoi Anus-joven rannal olluos Antulan hierus. Piirustamine da mualuandutaido ruvettih kiinostamah händy  vie alguškolas opastujes. Myöhembi jo aiguzennu olles vuonnu 1960 Nikolai Petrovič loppi Moskovan taidoyliopiston. Kaikkiedah kogo elaijas hänel on mualattu piäle suan kuvua. Niilöis ozutettavakse Petroskoih häi toi nellikymmen viizi parastu. Nikolai Petrvičan mualavuksis voibi nähtä Anuksen muan luonnon da hieruloin čomuttu. Ga enämbäl kaikkie taidoilii suvaiččou mualata Luadogua.

- Vähembi suvačen mualata hieruloi, sendäh gu nygöi monet taidoilijat mualatah karjalazii hieruloi da vie en suvaiče mualata vahnoi da huonos kunnos olijoi taloloi. Konzu mualuan hieruloih niškoi, ainos mualuan hyvät da čomat taloit, sellittäy Nikolai Petrovič.

Samannu piän Karjalan rahvahallizien kul’tuuroin keskukses Nikolai Zaitsev pidi oman Katkattu oza -kniigan prezentatsien. Se on kirjuttajan jo toine kniigu, enne sidä ilmah piäzi Omat ikkunat-kniigu. Uvves kniigas on yheksä kerdomustu, niilöin piähengilöinny ollah tavallizet rahvas. Nikolai Zaitsev kirjuttau sit, midä iče konzutahto nägi da kuuli. Hänen kerdomuksien piätiemannu on Anuksen da Suvi-Karjalan hieruloin histourii, eläjien elaigu: heijän ilot, tuskat, huolet. Enämbäl kaikkie kirjuttaijua kiinnostau ristikanzan hengi.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat