Vienan Karjala

Kirjutukset vienankarjalakse

Oma Sampo-melliččy

Korela da Karjala -ozuttelu on enzimäine iččenäine Margarita Kemppazen tyttilöin ozuttelu. Ga tädä enne muasterin tyttii, čomendustu da ruuttii sai nähtä yhtehizis ozuttelulois. Oli Margarita Kemppazel iččenästygi fotokuvien ozutteluu. // Kuva: Ol'ga Smotrova

Oman enzimäzen tytin ”Oman Muan” ruadai Margarita Kemppainen luadi vie viizitostu vuottu tagaperin. Silloi häi ombeli Oman Pajon horalazile karjalazet XIX vuozisuan ruutat. Jiännyzis kangaspalazis, tilkuzis juohtui mieleh luadie sen aijan, ga pienembät sovat tytile.

Tämän jälgeh on šuoritettu äijy tyttii. Enämbi kolmiekymmendy. Enzimäzii tyttilöi Margarita luadi lahjakse. Sanou, omua ”karjalastu” lahjua ku ei olluh kus ostua, ga pidi luadie sit omin käzin. Luadigi, vedi Ven’ale, Suomeh, Ruoččih. Ozuttelus, kudai avavui Perindöllizien käzineroloin keskukses, on muasterin 25 tyttii.

Omas kois da “Oman Muan” toimitukses Rital rodih oma pajagi dai ”ozutteluzualu” nämmile tyttilöile. Niilöis häi ruadau, tarkazeh valliččou kangahat tyttilöin ruuttih niškoi, net, sanakse, kai ollah natural’noit, kui ennegi oli meijän rahvahal. Niilöis häi ottau vastah rahvastu. Kengo tuou kangastu, kengo nahkua, kengo nybliä. Enimät tytitgi ollah rahvahan annetut. Net vai muasterin ruattuu suajah uuzi oza – karjalaine.

– Tiijättöhäi, midä rodih Sampo-melličäle, kudamas torattih ”Kalevalas”. Jäi vai kate, iče melliččy palazikse murjoi da lendi mereh. Minä näppizin, palazin keräin tukkuh tieduo omas kul’tuuras, omas rahvahas. Suitin neruo.  Tämä palazis kerätty melliččy rubei ruadamah rahvahan hyväkse, sellittäy Margarita Kemppainen. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat