Vienan Karjala

Kirjutukset vienankarjalakse

Vastuvirdah soudai Karhu

Santtu Karhu jo kaksikymmen viizi vuottu kehittäy karjalankielisty rock-muuzikkua yksinäh // Kuva: Jelena Filippova

Enzikse ga, suurembii da tärgiembii uudizii – “Talvisovat” on elvytty. Jälles kaksi vuottu kestänytty välii, “Talvisovat” tuaste ruvetah harjoittelemah da kuulumah. Ni yhty en liijustele ku sanonen: sidä vuotettih joukon suvaiččijat Karjalas dai rajan tagua. Endizelleh joukos paiči iče Santtuu, “Talvisobien” perustajia, ruvetah soittamah  F’odor Astašov, Art’om Undalov da Mihail Kokšarov. Muudu harjoittelendukohtua ku ei ole, ga sit kerävytäh Santun kodih. Karhul kois on kai, midä pidäy soittajes. “Akku sit vai hiädäy”, nagrau Santtu. “Aiguhizet ku olemmo, ga kerran kuus voibi harjoitella”, ližiäy vie. Tulou juohattua vahnua pajuo da opastuo uuttu. Niidy Santul on suittunuh kogonazeh diskah, eihäi Karhu joudavannu ole, ainos midätah kirjuttau ku kirjutettavua on, sen iče vihjuau. “Kačot da nagrat sidä elaigua, ičessäh runot tullahgi”, sellittäy häi. 

Toizekse, karjankielizele rock-muuzikale täydyi 25 vuottu. Sen alguhpanijannuhäi oli Santtu Karhu. Tänä keviän Santtu uskaldau luadie konsertu, illačču, kudai roihgi tälle merkipäiväle omistettu.

Igii ku lugenemmo, ga onnuako ei äijiä ole, ga ruado suuri on nämmis vuozis ruattu. Se kiistämätöi on. Silloi kaksikymmen viizi vuottu tagaperin rahvas kiännyttih omih juurih, omah kieleh. Kielen elävyttämine libui, rahvastu karjalastu sit ruavos oli äijy. Ga Karhu ottavui sih ruadoh, kudamua händy enne niken ei ruadanuh dai tässähhäi ei rua. Santtu Karhu tänäpäigi on ainavo karjalaine rock-pajattai. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat