Vienan Karjala

Kirjutukset vienankarjalakse

Lembi-kalenteri tulou hyväkši lahjakši

– Lempi-kalenterin ideja šynty Nuori Karjala -nuorisojärještön hallitukšen jäšenen Aleksei Tsikarevin piäššä viisi vuotta takaperin, Periodika-kuštantamon kuštannuštoimittaja ta šamalla Nuoren Karjalan piälikkö Alina Čuburova kerto. –  Šilloin Aleksei tuli Marin tašavallašta ta toi värikkähän kalenterin, kumpasen aihiena oli marilaini kaunehuš ta rakkahuš. Jo šilloin, vuotena 2010 rupesima valmistelomah tätä kalenterie. Aikua mäni äijän! (Nakrau).

Šilloin täh projektih liityttih Karjalan Šivissyššeura ta Helsinkin yliopiston ylioppilaškunnan Šukukanšavalijokunta, kumpaset annettih tukie meilä ta näijen järještöjen rahotušta riitti valokuvuajan palkkijoh ta kalenterin taiton valmistamiseh. Šilloin šuunnittelima kalenterie vuuvvekši 2012. Ka emmä löytän rahotušta šen tuloštamiseh. Šiitä lähtien valmistelima kalenterin taittuo joka vuuvvekši, passipot taiton luatijalla Ol’ga Makarovalla, kumpasella riitti tirppua ruatua meijän kera ta Nuoren Karjalan hallitukšen jäšenillä Natalie Pellisellä, kumpani löysi voimua toteuttua tämän projektin.

Ka toivo kuolou viimesenä (Надежда умирает последней) – šanotah Venäjällä. Tänä vuotena Karjalan Šivissyššeura on antan Periodika-kuštantamolla Kalevala-eepossan myötäväkši ta šamalla luvan, jotta šuatuilla varoilla kuštantamo voit luatie minnih toisen karjalankielisen kirjan tahi tuottehen. Pikkusen myöhemmin oli šovittu, jotta šemmosena tuottehena voisi olla Lembi-kalenteri vuuvvekši 2016.

– Tämän kalenterin aihiena on lempi (käsiteh, kumpani karjalan kieleššä tarkottau seksualista viehätyštä), – Lempi-kalenteri-projektin toteuttaja, Kieli-instituutin ruataja, folklorin tutkija Natalie Pellinen kerto. – Neiččyöllä noššettih lempie, još prihat ei välitetty häneštä nuorien kisoissa tahi kos’s’ojat ei tultu pitälti hänen taloh. Onnakko pojillaki lempi voipi olla šorrettuna. On olomašša äijän taikamänöjä ta niihi kuulujie lemmennoštoloiččuja, kut rahvahan mieleštä eniten autettih talvi- ta erikoisešti kešäsv’atkoina.

Kalenterin karjalan- ta venyähenkieliset tekstit, kumpaset on otettu eri kirjoista ta valokuvat, kumpaset luati Karjalašša tunnettu valokuvuaja ta Venyähen valokuvakilpailujen voittaja Kirill Ognev, košetah muitaki lempeh liittyjie aiheita: tykkyämini, pereh, lapšien kašvatanta. Kaikki nämä aihiet voit löytyä karjalaisen folklorin eri lajiloissa, onnakko kalenterih mahuttih vain pienikokoset lajit. Kalenterissa on eniten šananpolvija ta častuškoja (viimesekši mainittu laji muitein on melko myöhäni folklori-ilmijö).

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat