Vienan Karjala

Kirjutukset vienankarjalakse

Ranuan eläinpuisto on Lapin piänähtävyš

Joulupukki tykkyäy käyvä Ranuan eläinpuistoh. // Kuva: tvoirovaniemi.livejournal.com -nettišivu

RanuaZoo-eläinpuisto tariččou kävijillä nähä arktisen alovehen eläjie ympäri vuuvven niillä mahollisimman luonnonmukasešša ympäristöššä. RanuaZoo on auki vuuvven joka päivänä ta vuuvvenaikojen vaihtelu antauki oman erikoisuon eläinpuiston elämäh.
Eläinpuistošša on noin 50 pohjoisfaunan villieläinlajie ta 200 eläinyksilyö. Humaaniset šuomelaiset oikein piätettih, jotta eksottisie eteläeläimie ei pie tuuvva eläinpuistoh, kumpani šijaiččou N’apapiirin lähellä. Kešällä eläinpuiston alovehella toimiu kotieläinpuisto. Šamoin šielä ruatau polničča eläimie varoin. RanuaZoo on Lapin piänähtävyš perehlepuo varoin.
Eläinpuiston aloveh on ašetettu šuorah havumečäššä. Šielä ei ole häkkijä ta kaččuo elukkoja voipi kävellen kolmekilometristä puista polkuo myöten. Aštuon eläinpuiston polkuo šie johonmukasešti niät kaikkie elukkoja ta lintuja, kumpaset eletäh luonnollisissa oloissa.
RanuaZoo-puistošša eletäh kontiet, ilvekšet, hukat, ahmot, tunturirevot, hirvet, porot, kuušiporot, meččäpukit, myskihärkä, villišijat, šuarvat, niäjät, majavat, peto- ta kotilinnut, kiärmehet ta toiset elukat.
Eläinpuiston lähellä on starinallini Mur-Mur-linna, kumpasešša myyvväh kukkasie, eläimien kuvijoja ta Fazer-makeisyritykšen makijaisie. Talvella Ranuašša ruatau safari: voipi ajella poroloilla, koiravaljakoissa, mouttorikelkalla, šukšilla.
RanuaZoo on ainut paikka Šuomešša, missä voit nähä jiäkonteita. A vuotena 2012 Ranua tuli harvinaisekši puistokši, kumpasešša jiäkonteilla ilmeššyttih poikaset: Venus-emällä ta Manasse-urokšella šynty Ranzo-poikani. Vuuvven 2014 oraškuušša kašvanut kontienpoikani oli annettu Venan eläintarhah. Šamoin 2014 vuotena jiäkonteilla tuaš šynnyttih poikaset, ka ne valitettavašti kuoltih.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat