Vienan Karjala

Kirjutukset vienankarjalakse

Kanuadaspäi livvin raiživole

Petroskois Lloid Morin on opastunnuh karjalan kieleh, rubei lugemah da tiluamah lehtie karjalan kielel. Vie opastui meijän rahvahan perindölöih – Perindöllizien käzineroloin keskukses opastui puunleikkavukseh. // Kuva: Jelena Filippova

Konzu kanuadalaine Lloid Morin rubei Itä-Suomen yliopistos tutkimah sotsiolougiedu, hänele tuli mieleh ližätä sih lingvistiekan aspektu. Nenga brihua ruvettih kiinnostamah vähembistökielet da vähembistörahvas. Suomespäi Lloid tuli Karjalah opastumah, tutkimah da sellittelemäh karjalan kielen tilua. Tahtoi midä vai vois enämbäl olla yhtevyksis karjalazienke, bokku bokas kiini eliä heijänke, kus suas ellendiä, mittumat rahvas hyö ollah da kui ollah oman kielen puoleh.

Konzu Lloid jo tiezi omas Karjalah tulendas, ga kaikkiel ečči, kus vois opastuo kieleh. Enzikse, syvyskuun allus, briha lähti Petroskoin valdivonyliopistoh. Rubei opastumah liygii yhtes enzimäzen vuozikursan opastujienke. Ligakuul tuli livvin kursiloile, kudamii pietäh Kanzallizien kul’tuuroin keskukses. Tiijusti vie ”Čičiliuškun” ruavos dai lähti sinne harjoittelemah. Oli brihal oma rouligi Mie olen tipa, šie olet tipa -spektaklis. Kui sanou iče laval olendu eigo pöllätä, eigo varaita, ku hänen enzimäine suadu ammatti on taidoh kiini. Varaitti vai opastuttaval kielel ezittyö, jygiettävy ku on.

Karjalazien lujat tahtot

Muite ga Lloid sanou, ku teatras harjoittelendu oli ylen hyövylline da mieldykiinnittäi ruado. Karjalan kieli brihan mugah sežo hos i on vaigei, ga mieldykiinnittäi opastuo. Lloidale, kudaman enzimäine muamankieli on anglien kieli, karjalan kielen sanasto oli ihan toizenmoine. Sen kieliopis on yhtehisty ven’an kielenke, kus sežo on oma sijoin sistiemu, eihäi tämänmostu anglien kieles ole. Ven’an kielen tiedämine, hos kielet ei olla sugukielii, vihjuaju briha, autoi karjalan kielen opastundas. Kerras ellendettävät oldih sanat, kudamat on tuldu karjalah ven’an kielespäi.

Kuibo karjalazet, mittumat kanuadalazen silmin hyö ollah?.. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat