Vienan Karjala

Kirjutukset vienankarjalakse

Teilä kaikki onnistuu

Nuorien kalevalalaisien peruštama Piätinččä-joukko hyvin onnistu Petroskoin yliopiston KVN-kilpailuissa. // Kuva: Nadežda Vasiljeva

Piäparatilla Moskovah lähtöy Pavel Bukinič ta merišotaparatilla Sevastopolissa rupieu auttamah Julija Malikina.
Kalevalan koulun piäštökäš Julija Malikina nyt opaštuu Petroskoin tehnologijan ta liikehalan opistošša. Julijašta tulou tuottehien ta ruokintapalvelujen tehnologi. Opiston jälkeh Julija meinuau jatkua opaššušta Petroskoin valtijon yliopistošša.
– Rehellisešti šanuon en vieläkänä voi uškuo, jotta piäšen ošallistumah meijän muan niin tärkieh tapahtumah, Voitonparatih Sevastopol-šankarikaupunkissa.
Hyvie uutisie kuuluu toisiltaki kalevalalaisilta nuorilta, Petroskoin yliopiston enšimmäisen vuosikurššin opaštujilta Erkki Tuomilta ta Ort’t’o Lešoselta. KVN:n (ilosien ta kekšelijien klubi) innokkahina peluajina pojat on jo tultu hyvin tutuiksi yliopiston opaštujilla. Alušta Erkki ta Ort’t’o esiinnyttih yliopiston joukošša, ka 2015 vuuvven alušša piätettih peruštua oma joukko ta ošallistuo kilpailuih iččenäisešti. Näin šynty Piätinččä-joukko, kumpaseh kuulutah Ort’t’o Lesonen (joukon kapitani), Erkki Tuomi ta Nikita Klimov. Huolimatta šiitä, jotta Nikita on petroskoilaini, kilpailuissa joukko etuštau Kalevalua. Viime KVN-kilpailuissa pojat piäštih 1/4 välieräh. Kaikkijah kilpailuh ošallistu kahekšan joukkuo, niistä vain puolet piäštih jatkuh.   
Näitä nuorie poikie ta Julijua Malikinua yhistäy še, jotta vielä ei niin ammuin hyö oltih Kalevalan piirin nuoriso -liikkehen ošallistujat, kumpani oli peruššettu šeiččemen vuotta takaperin. Šilloin liikkehen piäšuunnakši oli valittu volont’oritoiminta ta juuri šilloin nuoret KVN-peluajatki ruvettih kuottelomah voimieh Kalevalan kotilavalla. Kalevalan koulun Kiušajat-nimini KVN-joukko kävi peluamah Kemissä, Kontupohjašša ta Petroskoissa. Joukko pikkuhil’l’ua kehitty ta šai kokemušta, mi tuliki nykyjäh pojilla hyövykši.
Julija Malikinan volont’oritoiminta alko Kalevalašša. Hiän tovarissojah kera autto vanhoja ihmisie, šotah ošallistujie ta työveteranija, aina oli auttamašša Kalevalan perintehellisien valjakkokilpailujen valmistamis- ta järještämistöissä.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat